Zaboor 33
allaah kee hukoomat aur madad kee taareef
1ai raastbaazo, rabb kee khushee manaao! kyoonki munaasib hai ki seedhee raah par chalnay vaalay us kee sitaaish karen.
2sarod baja kar rabb kee hamd-o-sana karo. us kee tamjeed men das taaron vaala saaz bajaao.
3us kee tamjeed men naya geet gaao, mahaarat say saaz baja kar khushee kay naaray lagaao.
4kyoonki rabb ka kalaam sachcha hai, aur vah har kaam vafaadaaree say karta hai.
5usay raastbaazee aur insaaf piyaaray hain, duniya rabb kee shafqat say bharee huee hai.
6rabb kay kahenay par aasmaan khalaq hua, us kay munh kay dam say sitaaron ka poora lashkar vujood men aaya.
7vah samundar kay paanee ka bada dher jama karta, paanee kee gaheraaiyon ko godaamon men mahfooz rakhta hai.
8kul duniya rabb ka khauf maanay, zameen kay tamaam baashinday us say dahshat khaaen.
9kyoonki us nay farmaaya to fauran vujood men aaya, us nay hukm diya to usee vaqt qaaim hua.
10rabb aqvaam ka mansooba naakaam honay deta, vah ummaton kay iraadon ko shikast deta hai.
11lekin rabb ka mansooba hamesha tak kaamyaab raheta, us kay dil kay iraaday pusht-dar-pusht qaaim rahetay hain.
12mubaarak hai vah qaum jis ka khuda rabb hai, vah qaum jisay us nay chun kar apnee meeraas bana liya hai.
13rabb aasmaan say nazar daal kar tamaam insaanon ka mulaahaza karta hai.
14apnay takht say vah zameen kay tamaam baashindon ka muaaina karta hai.
15jis nay un sab kay dilon ko tashkeel diya vah un kay tamaam kaamon par dhyaan deta hai.
16baadshaah kee badee fauj usay naheen chhudaatee, aur soormay kee badee taaqat usay naheen bachaatee.
17ghoda bhee madad naheen kar sakta. jo us par ummeed rakhay vah dhoka khaaega. us kee badee taaqat chhutkaara naheen detee.
18yaqeenan rabb kee aankh un par lagee rahetee hai jo us ka khauf maantay aur us kee meharbaanee kay intizaar men rahetay hain,
19ki vah un kee jaan maut say bachaaay aur kaal men mahfooz rakhay.
20hamaaree jaan rabb kay intizaar men hai. vahee hamaara sahaara, hamaaree dhaal hai.
21hamaara dil us men khush hai, kyoonki ham us kay muqaddas naam par bharosa rakhtay hain.
22ai rabb, teree meharbaanee ham par rahay, kyoonki ham tujh par ummeed rakhtay hain.