Zaboor 34

allaah kee hifaazat

¹daaood ka yah zaboor us vaqt say mutaalliq hai jab us nay filistee baadshaah abeemlik kay saamnay paagal bannay ka roop bhar liya. yah dekh kar baadshaah nay usay bhaga diya. chalay jaanay kay baad daaood nay yah geet gaaya.

har vaqt main rabb kee tamjeed karoonga, us kee hamd-o-sana hamesha hee meray honton par rahegee.

²meree jaan rabb par fakhar karegee. museebatzada yah sun kar khush ho jaaen.

³aao, meray saath rabb kee taazeem karo. aao, ham mil kar us ka naam sarbuland karen.

⁴main nay rabb ko talaash kiya to us nay meree sunee. jin cheezon say main dahshat kha raha tha un sab say us nay mujhay rihaaee dee.

⁵jin kee aankhen us par lagee rahen vah khushee say chamkengay, aur un kay munh sharminda naheen hongay.

⁶is naachaar nay pukaara to rabb nay us kee sunee, us nay usay us kee tamaam museebaton say najaat dee.

⁷jo rabb ka khauf maanen un kay ird-gird us ka farishta khaimaazan ho kar un ko bachaaay rakhta hai.

⁸rabb kee bhalaaee ka tajriba karo. mubaarak hai vah jo us men panaah lay.

⁹ai rabb kay muqaddaseen, us ka khauf maano, kyoonki jo us ka khauf maanen unhen kamee naheen.

¹⁰javaan sherbabar kabhee zarooratmand aur bhookay hotay hain, lekin rabb kay taalibon ko kisee bhee achchhee cheez kee kamee naheen hogee.

¹¹ai bachcho, aao, meree baaten suno! main tumhen rabb kay khauf kee taaleem doonga.

¹²kaun mazay say zindagee guzaarna aur achchhay din dekhna chaahata hai?

¹³vah apnee zabaan ko shareer baaten karnay say rokay aur apnay honton ko jhoot bolnay say.

¹⁴vah buraaee say munh pher kar nek kaam karay, sulah-salaamatee ka taalib ho kar us kay peechhay laga rahay.

¹⁵rabb kee aankhen raastbaazon par lagee rahetee hain, aur us kay kaan un kee iltijaaon kee taraf maail hain.

¹⁶lekin rabb ka chihara un kay khilaaf hai jo ghalat kaam kartay hain. un ka zameen par naam-o-nishaan tak naheen rahega.

¹⁷jab raastbaaz faryaad karen to rabb un kee sunta, vah unhen un kee tamaam museebat say chhutkaara deta hai.

¹⁸rabb shikastaadilon kay qareeb hota hai, vah unhen rihaaee deta hai jin kee rooh ko khaak men kuchla gaya ho.

¹⁹raastbaaz kee mut’addid takaaleef hotee hain, lekin rabb usay un sab say bacha leta hai.

²⁰vah us kee tamaam haddiyon kee hifaazat karta hai, ek bhee naheen todee jaaegee.

²¹buraaee bedeen ko maar daalegee, aur jo raastbaaz say nafrat karay usay munaasib ajr milega.

²²lekin rabb apnay khaadimon kee jaan ka fidya dega. jo bhee us men panaah lay usay saza naheen milegee.