Zaboor 36
allaah kee meharbaanee kee taareef
1rabb kay khaadim daaood ka zaboor. mooseeqee kay raahanuma kay liyay.
badkaaree bedeen kay dil hee men us say baat kartee hai. us kee aankhon kay saamnay allaah ka khauf naheen hota,
2kyoonki us kee nazar men yah baat fakhar ka baais hai ki usay qusoorvaar paaya gaya, ki vah nafrat karta hai.
3us kay munh say sharaarat aur fareb nikalta hai, vah samajhdaar honay aur nek kaam karnay say baaz aaya hai.
4apnay bistar par bhee vah sharaarat kay mansoobay baandhta hai. vah mazbootee say buree raah par khada raheta aur buraaee ko mustarad naheen karta.
5ai rabb, teree shafqat aasmaan tak, teree vafaadaaree baadlon tak pahunchtee hai.
6teree raastee bulandtareen pahaadon kee maanind, tera insaaf samundar kee gaheraaiyon jaisa hai. ai rabb, too insaan-o-haivaan kee madad karta hai.
7ai allaah, teree shafqat kitnee beshaqeemat hai! aadamzaad teray paron kay saay men panaah letay hain.
8vah teray ghar kay umda khaanay say tar-o-taaza ho jaatay hain, aur too unhen apnee khushiyon kee nadee men say pilaata hai.
9kyoonki zindagee ka sarchashma teray hee paas hai, aur ham teray noor men rah kar noor ka mushaahada kartay hain.
10apnee shafqat un par phailaaay rakh jo tujhay jaantay hain, apnee raastee un par jo dil say diyaanatdaar hain.
11maghrooron ka paaon mujh tak na pahunchay, bedeenon ka haath mujhay beghar na banaaay.
12dekho, badkaar gir gaay hain! unhen zameen par patakh diya gaya hai, aur vah dubaara kabhee naheen uthengay.