Zaboor 37
bedeenon kee bazaahir khushhaalee
1daaood ka zaboor.
shareeron kay baais bechain na ho ja, badkaaron par rashak na kar.
2kyoonki vah ghaas kee tarah jald hee murjha jaaengay, hariyaalee kee tarah jald hee sookh jaaengay.
3rabb par bharosa rakh kar bhalaaee kar, mulk men rah kar vafaadaaree kee parvarish kar.
4rabb say lutf’andoz ho to jo tera dil chaahay vah tujhay dega.
5apnee raah rabb kay sapurd kar. us par bharosa rakh to vah tujhay kaamyaabee bakhshega.
6tab vah teree raastbaazee sooraj kee tarah tuloo honay dega aur tera insaaf dopaher kee raushnee kee tarah chamaknay dega.
7rabb kay huzoor chup ho kar sabr say us ka intizaar kar. beqaraar na ho agar saazishen karnay vaala kaamyaab ho.
8khafa honay say baaz a, ghussay ko chhod day. ranjeeda na ho, varna bura hee nateeja niklega.
9kyoonki shareer mit jaaengay jabki rabb say ummeed rakhnay vaalay mulk ko meeraas men paaengay.
10mazeed thodee der sabr kar to bedeen ka naam-o-nishaan mit jaaega. too us ka khoj lagaaega, lekin kaheen naheen paaega.
11lekin haleem mulk ko meeraas men pa kar baday amn aur sukoon say lutf’andoz hongay.
12beshak bedeen daant pees pees kar raastbaaz kay khilaaf saazishen karta rahay.
13lekin rabb us par hansta hai, kyoonki vah jaanta hai ki us ka anjaam qareeb hee hai.
14bedeenon nay talvaar ko khaincha aur kamaan ko taan liya hai taaki naachaaron aur zarooratmandon ko gira den aur seedhee raah par chalnay vaalon ko qatl karen.
15lekin un kee talvaar un kay apnay dil men ghompee jaaegee, un kee kamaan toot jaaegee.
16raastbaaz ko jo thoda bahut haasil hai vah bahut bedeenon kee daulat say behatar hai.
17kyoonki bedeenon ka baazoo toot jaaega jabki rabb raastbaazon ko sambhaalta hai.
18rabb beilzaamon kay din jaanta hai, aur un kee mauroosee milkiyat hamesha kay liyay qaaim rahegee.
19museebat kay vaqt vah sharmasaar naheen hongay, kaal bhee paday to ser hongay.
20lekin bedeen halaak ho jaaengay, aur rabb kay dushman charaagaahon kee shaan kee tarah nest ho jaaengay, dhuen kee tarah ghaaib ho jaaengay.
21bedeen qarz leta aur usay naheen utaarta, lekin raastbaaz meharbaan hai aur fayyaazee say deta hai.
22kyoonki jinhen rabb barkat day vah mulk ko meeraas men paaengay, lekin jin par vah laanat bhejay un ka naam-o-nishaan tak naheen rahega.
23agar kisee kay paaon jam jaaen to yah rabb kee taraf say hai. aisay shakhs kee raah ko vah pasand karta hai.
24agar gir bhee jaaay to pada naheen rahega, kyoonki rabb us kay haath ka sahaara bana rahega.
25main javaan tha aur ab boodha ho gaya hoon. lekin main nay kabhee naheen dekha ki raastbaaz ko tark kiya gaya ya us kay bachchon ko bheek maangnee padee.
26vah hamesha meharbaan aur qarz denay kay liyay tayyaar hai. us kee aulaad barkat ka baais hogee.
27buraaee say baaz a kar bhalaaee kar. tab too hamesha kay liyay mulk men aabaad rahega,
28kyoonki rabb ko insaaf piyaara hai, aur vah apnay eemaandaaron ko kabhee tark naheen karega. vah abad tak mahfooz rahengay jabki bedeenon kee aulaad ka naam-o-nishaan tak naheen rahega.
29raastbaaz mulk ko meeraas men pa kar us men hamesha basengay.
30raastbaaz ka munh hikmat bayaan karta aur us kee zabaan say insaaf nikalta hai.
31allaah kee shareeat us kay dil men hai, aur us kay qadam kabhee naheen dagmagaaengay.
32bedeen raastbaaz kee taak men baith kar usay maar daalnay ka mauqa dhoondta hai.
33lekin rabb raastbaaz ko us kay haath men naheen chhodega, vah usay adaalat men mujrim naheen thahernay dega.
34rabb kay intizaar men rah aur us kee raah par chalta rah. tab vah tujhay sarfaraaz karkay mulk ka vaaris banaaega, aur too bedeenon kee halaakat dekhega.
35main nay ek bedeen aur zaalim aadmee ko dekha jo phaltay phooltay deodaar kay darakht kee tarah aasmaan say baaten karnay laga.
36lekin thodee der kay baad jab main dubaara vahaan say guzra to vah tha naheen. main nay us ka khoj lagaaya, lekin kaheen na mila.
37beilzaam par dhyaan day aur diyaanatdaar par ghaur kar, kyoonki aakhirkaar usay amn aur sukoon haasil hoga.
38lekin mujrim mil kar tabaah ho jaaengay, aur bedeenon ko aakhirkaar roo-ay-zameen par say mitaaya jaaega.
39raastbaazon kee najaat rabb kee taraf say hai, museebat kay vaqt vahee un ka qil’a hai.
40rabb hee un kee madad karkay unhen chhutkaara dega, vahee unhen bedeenon say bacha kar najaat dega. kyoonki unhon nay us men panaah lee hai.