Zaboor 38
saza say bachnay kee iltija (tauba ka teesra zaboor)
1daaood ka zaboor. yaadadaasht kay liyay.
ai rabb, apnay ghazab men mujhay saza na day, qaher men mujhay tambeeh na kar!
2kyoonki teray teer meray jism men lag gaay hain, tera haath mujh par bhaaree hai.
3teree laanat kay baais mera poora jism beemaar hai, meray gunaah kay baais meree tamaam haddiyaan galnay lagee hain.
4kyoonki main apnay gunaahon kay sailaab men doob gaya hoon, vah naaqaabil-ay-bardaasht bojh ban gaay hain.
5meree hamaaqat kay baais meray zakhmon say badboo aanay lagee, vah galnay lagay hain.
6main kubda ban kar khaak men dab gaya hoon, poora din maatmee libaas pahenay phirta hoon.
7meree kamar men shadeed sozish hai, poora jism beemaar hai.
8main nidhaal aur paash paash ho gaya hoon. dil kay azaab kay baais main cheekhta chillaata hoon.
9ai rabb, meree tamaam aarzoo teray saamnay hai, meree aahen tujh say posheeda naheen raheteen.
10mera dil zor say dhadakta, meree taaqat javaab day gaee balki meree aankhon kee raushnee bhee jaatee rahee hai.
11meray dost aur saathee meree museebat dekh kar mujh say gurez kartay, meray qareeb kay rishtedaar door khaday rahetay hain.
12meray jaanee dushman phanday bichha rahay hain, jo mujhay nuqsaan pahunchaana chaahatay hain vah dhamkiyaan day rahay aur saara saara din farebdih mansoobay baandh rahay hain.
13aur main? main to goya bahera hoon, main naheen sunta. main goongay kee maanind hoon jo apna munh naheen kholta.
14main aisa shakhs ban gaya hoon jo na sunta, na javaab men etiraaz karta hai.
15kyoonki ai rabb, main teray intizaar men hoon. ai rabb meray khuda, too hee meree sunega.
16main bola, “aisa na ho ki vah mera nuqsaan dekh kar baghlen bajaaen, vah meray paaon kay dagmagaanay par mujhay daba kar apnay aap par fakhar karen.”
17kyoonki main ladkhadaanay ko hoon, meree aziyat mutvaatir meray saamnay rahetee hai.
18chunaanchay main apna qusoor tasleem karta hoon, main apnay gunaah kay baais ghamgeen hoon.
19meray dushman zinda aur taaqatvar hain, aur jo bilaavajah mujh say nafrat kartay hain vah bahut hain.
20vah nekee kay badlay badee kartay hain. vah is liyay meray dushman hain ki main bhalaaee kay peechhay laga raheta hoon.
21ai rabb, mujhay tark na kar! ai allaah, mujh say door na rah!
22ai rabb meree najaat, meree madad karnay men jaldee kar