Zaboor 4

shaam ko madad kay liyay duaa

¹daaood ka zaboor. mooseeqee kay raahanuma kay liyay. taardaar saazon kay saath gaana hai.

ai meree raastee kay khuda, meree sun jab main tujhay pukaarta hoon. ai too jo museebat men meree makhlsee raha hai mujh par meharbaanee karkay meree iltija sun!

²ai aadamazaado, meree izzat kab tak khaak men milaaee jaatee rahegee? tum kab tak baatil cheezon say liptay rahogay, kab tak jhoot kee talaash men rahogay? (silaah)

³jaan lo ki rabb nay eemaandaar ko apnay liyay alag kar rakha hai. rabb meree sunega jab main usay pukaaroonga.

⁴ghussay men aatay vaqt gunaah mat karna. apnay bistar par let kar muaamalay par soch-bichaar karo, lekin dil men, khaamoshee say. (silaah)

⁵raastee kee qurbaaniyaan pesh karo, aur rabb par bharosa rakho.

⁶bahuteray shak kar rahay hain, “kaun hamaaray haalaat theek karega?” ai rabb, apnay chiharay ka noor ham par chamka!

⁷too nay meray dil ko khushee say bhar diya hai, aisee khushee say jo un kay paas bhee naheen hotee jin kay paas kasrat ka anaaj aur angoor hai.

⁸main aaraam say let kar so jaata hoon, kyoonki too hee ai rabb mujhay hifaazat say basnay deta hai.