Zaboor 41

mareez kee duaa

¹daaood ka zaboor. mooseeqee kay raahanuma kay liyay.

mubaarak hai vah jo pastahaal ka khayaal rakhta hai. museebat kay din rabb usay chhutkaara dega.

²rabb us kee hifaazat karkay us kee zindagee ko mahfooz rakhega, vah mulk men usay barkat day kar usay us kay dushmanon kay laalach kay havaalay naheen karega.

³beemaaree kay vaqt rabb us ko bistar par sambhaalega . too us kee sehat pooree tarah bahaal karega.

⁴main bola, “ai rabb, mujh par rahem kar! mujhay shifa day, kyoonki main nay tera hee gunaah kiya hai.”

⁵meray dushman meray baaray men ghalat baaten karkay kahetay hain, “vah kab marega? us ka naam-o-nishaan kab mitega?”

⁶jab kabhee koee mujh say milnay aaay to us ka dil jhoot bolta hai. pas-ay-parda vah aisee nuqsaandih maaloomaat jama karta hai jinhen baad men baahar ja kar galiyon men phaila sakay.

⁷mujh say nafrat karnay vaalay sab aapas men meray khilaaf phusaphusaatay hain. vah meray khilaaf buray mansoobay baandh kar kahetay hain,

⁸“usay muhalak marz lag gaya hai. vah kabhee apnay bistar par say dubaara naheen uthega.”

⁹mera dost bhee meray khilaaf uth khada hua hai. jis par main etimaad karta tha aur jo meree rotee khaata tha, us nay mujh par laat uthaaee hai.

¹⁰lekin too ai rabb, mujh par meharbaanee kar! mujhay dubaara utha khada kar taaki unhen un kay sulook ka badla day sakoon.

¹¹is say main jaanta hoon ki too mujh say khush hai ki mera dushman mujh par fatah kay naaray naheen lagaata.

¹²too nay mujhay meree diyaanatdaaree kay baais qaaim rakha aur hamesha kay liyay apnay huzoor khada kiya hai.

¹³rabb kee hamd ho jo israaeel ka khuda hai. azal say abad tak us kee tamjeed ho. aameen, phir aameen.