Zaboor 42
doosree kitaab 42-72
pardes men allaah ka aarzoomand
1qorah kee aulaad ka zaboor. hikmat ka geet. mooseeqee kay raahanuma kay liyay.
ai allaah, jis tarah hirnee nadiyon kay taaza paanee kay liyay tadaptee hai usee tarah meree jaan teray liyay tadaptee hai.
2meree jaan khuda, haan zinda khuda kee piyaasee hai. main kab ja kar allaah ka chihara dekhoonga?
3din raat meray aansoo meree ghiza rahay hain. kyoonki poora din mujh say kaha jaata hai, “tera khuda kahaan hai?”
4pahelay haalaat yaad karkay main apnay saamnay apnay dil kee aah-o-zaaree undel deta hoon. [a] lafzee tarjuma : apnee jaan undel deta hoon. kitna maza aata tha jab hamaara juloos nikalta tha, jab main hujoom kay beech men khushee aur shukrguzaaree kay naaray lagaatay huay allaah kee sukoonatgaah kee jaanib badhta jaata tha. kitna shor mach jaata tha jab ham jashn manaatay huay ghoomtay phirtay thay.
5ai meree jaan, too gham kyoon kha rahee hai, bechainee say kyoon tadap rahee hai? allaah kay intizaar men rah, kyoonki main dubaara us kee sitaaish karoonga jo mera khuda hai aur meray dekhtay dekhtay mujhay najaat deta hai.
6meree jaan gham kay maaray pighal rahee hai. is liyay main tujhay yardan kay mulk, harmoon kay pahaadee silsilay aur koh-ay-mis’aar say yaad karta hoon.
7jab say teray aabshaaron kee aavaaz buland huee to ek sailaab doosray ko pukaarnay laga hai. teree tamaam maujen aur laheren mujh par say guzar gaee hain.
8din kay vaqt rabb apnee shafqat bhejega, aur raat kay vaqt us ka geet meray saath hoga, main apnee hayaat kay khuda say dua karoonga.
9main allaah apnee chataan say kahoonga, “too mujhay kyoon bhool gaya hai? main apnay dushman kay zulm kay baais kyoon maatmee libaas pahenay phiroon?”
10meray dushmanon kee laan-taan say meree haddiyaan toot rahee hain, kyoonki poora din vah kahetay hain, “tera khuda kahaan hai?”
11ai meree jaan, too gham kyoon kha rahee hai, bechainee say kyoon tadap rahee hai? allaah kay intizaar men rah, kyoonki main dubaara us kee sitaaish karoonga jo mera khuda hai aur meray dekhtay dekhtay mujhay najaat deta hai.