Zaboor 44

kya allaah nay apnee qaum ko radd kiya hai?

¹qorah kee aulaad ka zaboor. hikmat ka geet. mooseeqee kay raahanuma kay liyay.

ai allaah, jo kuchh too nay hamaaray baapdaada kay ayyaam men yaanee qadeem zamaanay men kiya vah ham nay apnay kaanon say un say suna hai.

²too nay khud apnay haath say deegar qaumon ko nikaal kar hamaaray baapdaada ko mulk men pauday kee tarah laga diya. too nay khud deegar ummaton ko shikast day kar hamaaray baapdaada ko mulk men phalnay phoolnay diya.

³unhon nay apnee hee talvaar kay zareeay mulk par qabza naheen kiya, apnay hee baazoo say fatah naheen paaee balki teray dahenay haath, teray baazoo aur teray chiharay kay noor nay yah sab kuchh kiya. kyoonki vah tujhay pasand thay.

⁴too mera baadshaah, mera khuda hai. teray hee hukm par yaaqoob ko madad haasil hotee hai.

⁵teree madad say ham apnay dushmanon ko zameen par patakh detay, tera naam lay kar apnay mukhaalifon ko kuchal detay hain.

⁶kyoonki main apnee kamaan par etimaad naheen karta, aur meree talvaar mujhay naheen bachaaegee

⁷balki too hee hamen dushman say bachaata, too hee unhen sharminda honay deta hai jo ham say nafrat kartay hain.

⁸poora din ham allaah par fakhar kartay hain, aur ham hamesha tak teray naam kee tamjeed karengay. (silaah)

⁹lekin ab too nay hamen radd kar diya, hamen sharminda honay diya hai. jab hamaaree faujen ladnay kay liyay nikaltee hain to too un ka saath naheen deta.

¹⁰too nay hamen dushman kay saamnay paspa honay diya, aur jo ham say nafrat kartay hain unhon nay hamen loot liya hai.

¹¹too nay hamen bhed-bakriyon kee tarah qassaab kay haath men chhod diya, hamen mukhtalif qaumon men muntashir kar diya hai.

¹²too nay apnee qaum ko khafeef see raqam kay liyay bech daala, usay farokht karnay say nafa haasil na hua.

¹³yah teree taraf say hua ki hamaaray padosee hamen rusva kartay, gird-o-navaah kay log hamen laan-taan kartay hain.

¹⁴ham aqvaam men ibrat’angez misaal ban gaay hain. log hamen dekh kar tauba tauba kahetay hain.

¹⁵din bhar meree rusvaaee meree aankhon kay saamnay rahetee hai. mera chihara sharmasaar hee raheta hai,

¹⁶kyoonki mujhay un kee gaaliyaan aur kufr sunna padta hai, dushman aur intiqaam lenay par tulay huay ko bardaasht karna padta hai.

¹⁷yah sab kuchh ham par a gaya hai, haalaanki na ham tujhay bhool gaay aur na teray ahd say bevafa huay hain.

¹⁸na hamaara dil baaghee ho gaya, na hamaaray qadam teree raah say bhatak gaay hain.

¹⁹taaham too nay hamen choor choor karkay geeddon kay darmiyaan chhod diya, too nay hamen gaheree taareekee men doobnay diya hai.

²⁰agar ham apnay khuda ka naam bhool kar apnay haath kisee aur maabood kee taraf uthaate

²¹to kya allaah ko yah baat maaloom na ho jaatee? zaroor! vah to dil kay raazon say vaaqif hota hai.

²²lekin teree khaatir hamen din bhar maut ka saamna karna padta hai, log hamen zabah honay vaalee bhedon kay baraabar samajhtay hain.

²³ai rabb, jaag uth! too kyoon soya hua hai? hamen hamesha kay liyay radd na kar balki hamaaree madad karnay kay liyay khada ho ja.

²⁴too apna chihara ham say posheeda kyoon rakhta hai, hamaaree museebat aur ham par honay vaalay zulm ko nazar’andaaz kyoon karta hai?

²⁵hamaaree jaan khaak men dab gaee, hamaara badan mittee say chimat gaya hai.

²⁶uth kar hamaaree madad kar! apnee shafqat kee khaatir fidya day kar hamen chhudaa