Zaboor 45

baadshaah kee shaadee

¹qorah kee aulaad ka zaboor. hikmat aur muhabbat ka geet. tarz : sosan kay phool. mooseeqee kay raahanuma kay liyay.

meray dil say khoobsoorat geet chhalak raha hai, main usay baadshaah ko pesh karoonga. meree zabaan maahir kaatib kay qalam kee maanind ho!

²too aadmiyon men sab say khoobsoorat hai! teray hont shafqat say masah kiay huay hain, is liyay allaah nay tujhay abdee barkat dee hai.

³ai soormay, apnee talvaar say kamarbasta ho, apnee shaan-o-shaukat say mulabbas ho ja!

⁴ghalba aur kaamyaabee haasil kar. sachchaaee, inkisaaree aur raastee kee khaatir ladnay kay liyay nikal a. tera dahena haath tujhay hairat’angez kaam dikhaaay.

⁵teray tez teer baadshaah kay dushmanon kay dilon ko chhed daalen. qaumen teray paaon men gir jaaen.

⁶ai allaah, tera takht azal say abad tak qaaim-o-daaim rahega, aur insaaf ka shaahee asa teree baadshaahee par hukoomat karega.

⁷too nay raastbaazee say muhabbat aur bedeenee say nafrat kee, is liyay allaah teray khuda nay tujhay khushee kay tel say masah karkay tujhay teray saathiyon say kaheen ziyaada sarfaraaz kar diya.

⁸mur, ood aur amalataas kee beshaqeemat khushboo teray tamaam kapdon say phailtee hai. haatheedaant kay mahelon men taardaar mooseeqee tera dil bahelaatee hai.

⁹baadshaahon kee betiyaan teray zevraat say sajee phirtee hain. malika ofeer ka sona pahenay huay teray dahenay haath khadee hai.

¹⁰ai betee, sun meree baat! ghaur kar aur kaan laga. apnee qaum aur apnay baap ka ghar bhool ja.

¹¹baadshaah teray husn ka aarzoomand hai, kyoonki vah tera aaqa hai. chunaanchay jhuk kar us ka ehatiraam kar.

¹²soor kee betee tuhfa lay kar aaegee, qaum kay ameer teree nazar-ay-karam haasil karnay kee koshish karengay.

¹³baadshaah kee betee kitnee shaandaar cheezon say aaraasta hai. us ka libaas sonay kay dhaagon say buna hua hai.

¹⁴usay nafees rangdaar kapday pahenay baadshaah kay paas laaya jaata hai. jo kunvaaree saheliyaan us kay peechhay chaltee hain unhen bhee teray saamnay laaya jaata hai.

¹⁵log shaadmaan ho kar aur khushee manaatay huay unhen vahaan pahunchaatay hain, aur vah shaahee mahel men daakhil hotee hain.

¹⁶ai baadshaah, teray betay teray baapdaada kee jagah khaday ho jaaengay, aur too unhen raees bana kar pooree duniya men zimmaadaariyaan dega.

¹⁷pusht-dar-pusht main teray naam kee tamjeed karoonga, is liyay qaumen hamesha tak teree sitaaish karengee.