Zaboor 47
allaah tamaam qaumon ka baadshaah hai
1qorah kee aulaad ka zaboor. mooseeqee kay raahanuma kay liyay.
ai tamaam qaumo, taalee bajaao! khushee kay naaray laga kar allaah kee madahsaraaee karo!
2kyoonki rabb t’aala purjalaal hai, vah pooree duniya ka azeem baadshaah hai.
3us nay qaumon ko hamaaray tahet kar diya, ummaton ko hamaaray paaon talay rakh diya.
4us nay hamaaray liyay hamaaree meeraas ko chun liya, usee ko jo us kay piyaaray banday yaaqoob kay liyay fakhar ka baais tha. (silaah)
5allaah nay saood farmaaya to saath saath khushee ka naara buland hua, rabb bulandee par chadh gaya to saath saath narsinga bajta raha.
6madahsaraaee karo, allaah kee madahsaraaee karo! madahsaraaee karo, hamaaray baadshaah kee madahsaraaee karo!
7kyoonki allaah pooree duniya ka baadshaah hai. hikmat ka geet ga kar us kee sitaaish karo.
8allaah qaumon par hukoomat karta hai, allaah apnay muqaddas takht par baitha hai.
9deegar qaumon kay shurfa ibraaheem kay khuda kee qaum kay saath jama ho gaay hain, kyoonki vah duniya kay hukmaraanon ka maalik hai. vah nihaayat hee sarbuland hai.