Zaboor 49
ameeron kee shaan saraab hee hai
1qorah kee aulaad ka zaboor. mooseeqee kay raahanuma kay liyay.
ai tamaam qaumo, suno! duniya kay tamaam baashindo, dhyaan do!
2chhotay aur baday, ameer aur ghareeb sab tavajjuh den.
3mera munh hikmat bayaan karega aur meray dil ka ghaur-o-khauz samajh ata karega.
4main apna kaan ek kahaavat kee taraf jhukaaoonga, sarod baja kar apnee pahelee ka hal bataaoonga.
5main khauf kyoon khaaoon jab museebat kay din aaen aur makkaaron ka bura kaam mujhay gher lay?
6aisay log apnee milkiyat par etimaad aur apnee badee daulat par fakhar kartay hain.
7koee bhee fidya day kar apnay bhaaee kee jaan ko naheen chhuda sakta. vah allaah ko is qism ka taavaan naheen day sakta.
8kyoonki itnee badee raqam dena us kay bas kee baat naheen. aakhirkaar usay hamesha kay liyay aisee koshishon say baaz aana padega.
9chunaanchay koee bhee hamesha kay liyay zinda naheen rah sakta, aakhirkaar har ek maut kay gadhay men utrega.
10kyoonki har ek dekh sakta hai ki daanishmand bhee vafaat paatay aur ahemaq aur naasamajh bhee mil kar halaak ho jaatay hain. sab ko apnee daulat doosron kay liyay chhodnee padtee hai.
11un kee qabren abad tak un kay ghar banee rahengee, pusht-dar-pusht vah un men basay rahengay, go unhen zameenen haasil theen jo un kay naam par theen.
12insaan apnee shaan-o-shaukat kay baavujood qaaim naheen raheta, usay jaanvaron kee tarah halaak hona hai.
13yah un sab kee taqdeer hai jo apnay aap par etimaad rakhtay hain, aur un sab ka anjaam jo un kee baaten pasand kartay hain. (silaah)
14unhen bhed-bakriyon kee tarah paataal men laaya jaaega, aur maut unhen charaaegee. kyoonki subah kay vaqt diyaanatdaar un par hukoomat karengay. tab un kee shakl-o-soorat ghisay phatay kapday kee tarah gal sad jaaegee, paataal hee un kee rihaaishgaah hoga.
15lekin allaah meree jaan ka fidya dega, vah mujhay pakad kar paataal kee girift say chhudaaega. (silaah)
16mat ghabra jab koee ameer ho jaaay, jab us kay ghar kee shaan-o-shaukat badhtee jaaay.
17martay vaqt to vah apnay saath kuchh naheen lay jaaega, us kee shaan-o-shaukat us kay saath paataal men naheen utregee.
18beshak vah jeetay jee apnay aap ko mubaarak kahega, aur doosray bhee khaatay-peetay aadmee kee taareef karengay.
19phir bhee vah aakhirkaar apnay baapdaada kee nasal kay paas utrega, un kay paas jo dubaara kabhee raushnee naheen dekhengay.
20jo insaan apnee shaan-o-shaukat kay baavujood naasamajh hai, usay jaanvaron kee tarah halaak hona hai.