Zaboor 5
hifaazat kay liyay duaa
1daaood ka zaboor. mooseeqee kay raahanuma kay liyay. isay baansree kay saath gaana hai.
ai rabb, meree baaten sun, meree aahon par dhyaan day!
2ai meray baadshaah, meray khuda, madad kay liyay meree cheekhen sun, kyoonki main tujh hee say dua karta hoon.
3ai rabb, subah ko too meree aavaaz sunta hai, subah ko main tujhay sab kuchh tarteeb say pesh karkay javaab ka intizaar karnay lagta hoon.
4kyoonki too aisa khuda naheen hai jo bedeenee say khush ho. jo bura hai vah teray huzoor naheen thaher sakta.
5maghroor teray huzoor khaday naheen ho saktay, badkaar say too nafrat karta hai.
6jhoot bolnay vaalon ko too tabaah karta, khoonkhaar aur dhokebaaz say rabb ghin khaata hai.
7lekin mujh par too nay badee meharbaanee kee hai, is liyay main teray ghar men daakhil ho sakta, main tera khauf maan kar teree muqaddas sukoonatgaah kay saamnay sijda karta hoon.
8ai rabb, apnee raast raah par meree raahanumaaee kar taaki meray dushman mujh par ghaalib na aaen. apnee raah ko meray aagay hamvaar kar.
9kyoonki un kay munh say ek bhee qaabil-ay-etimaad baat naheen nikaltee. un ka dil tabaahee say bhara raheta, un ka gala khulee qabr hai, aur un kee zabaan chiknee-chupdee baaten ugaltee rahetee hai.
10ai rabb, unhen un kay ghalat kaam ka ajr day. un kee saazishen un kee apnee tabaahee ka baais banen. unhen un kay mut’addid gunaahon kay baais nikaal kar muntashir kar day, kyoonki vah tujh say sarkash ho gaay hain.
11lekin jo tujh men panaah letay hain vah sab khush hon, vah abad tak shaadiyaana bajaaen, kyoonki too unhen mahfooz rakhta hai. teray naam ko piyaar karnay vaalay tera jashn manaaen.
12kyoonki too ai rabb, raastbaaz ko barkat deta hai, too apnee meharbaanee kee dhaal say us kee chaaron taraf hifaazat karta hai.