Zaboor 50
saheeh ibaadat
1aasaf ka zaboor.
rabb qaadir-ay-mutlaq khuda bol utha hai, us nay tuloo-ay-subah say lay kar ghuroob-ay-aaftaab tak pooree duniya ko bulaaya hai.
2allaah ka noor siyyoon say chamak utha hai, us pahaad say jo kaamil husn ka izhaar hai.
3hamaara khuda a raha hai, vah khaamosh naheen rahega. us kay aagay aagay sab kuchh bhasm ho raha hai, us kay ird-gird tez aandhee chal rahee hai.
4vah aasmaan-o-zameen ko aavaaz deta hai, “ab main apnee qaum kee adaalat karoonga.
5meray eemaandaaron ko meray huzoor jama karo, unhen jinhon nay qurbaaniyaan pesh karkay meray saath ahd baandha hai.”
6aasmaan us kee raastee ka elaan karengay, kyoonki allaah khud insaaf karnay vaala hai. (silaah)
7“ai meree qaum, sun! mujhay baat karnay day. ai israaeel, main teray khilaaf gavaahee doonga. main allaah tera khuda hoon.
8main tujhay teree zabah kee qurbaaniyon kay baais malaamat naheen kar raha. teree bhasm honay vaalee qurbaaniyaan to musalsal meray saamnay hain.
9na main teray ghar say bail loonga, na teray baadon say bakray.
10kyoonki jangal kay tamaam jaandaar meray hee hain, hazaaron pahaadiyon par basnay vaalay jaanvar meray hee hain.
11main pahaadon kay har parinday ko jaanta hoon, aur jo bhee maidaanon men harkat karta hai vah mera hai.
12agar mujhay bhook lagtee to main tujhay na bataata, kyoonki zameen aur jo kuchh us par hai mera hai.
13kya too samajhta hai ki main saandon ka gosht khaana ya bakron ka khoon peena chaahata hoon?
14allaah ko shukrguzaaree kee qurbaanee pesh kar, aur vah mannat pooree kar jo too nay allaah t’aala kay huzoor maanee hai.
15museebat kay din mujhay pukaar. tab main tujhay najaat doonga aur too meree tamjeed karega.”
16lekin bedeen say allaah farmaata hai, “meray ahkaam sunaanay aur meray ahd ka zikr karnay ka tera kya haq hai?
17too to tarbiyat say nafrat karta aur meray farmaan kachray kee tarah apnay peechhay phaink deta hai.
18kisee chor ko dekhtay hee too us ka saath deta hai, too zinaakaaron say rifaaqat rakhta hai.
19too apnay munh ko buray kaam kay liyay istemaal karta, apnee zabaan ko dhoka denay kay liyay tayyaar rakhta hai.
20too doosron kay paas baith kar apnay bhaaee kay khilaaf bolta hai, apnee hee maan kay betay par tuhamat lagaata hai.
21yah kuchh too nay kiya hai, aur main khaamosh raha. tab too samjha ki main bilkul tujh jaisa hoon. lekin main tujhay malaamat karoonga, teray saamnay hee muaamala tarteeb say sunaaoonga.
22tum jo allaah ko bhoolay huay ho, baat samajh lo, varna main tumhen phaad daaloonga. us vaqt koee naheen hoga jo tumhen bachaaay.
23jo shukrguzaaree kee qurbaanee pesh karay vah meree taazeem karta hai. jo musammam iraaday say aisee raah par chalay usay main allaah kee najaat dikhaaoonga.”