Zaboor 51
mujh jaisay gunaahgaar par rahem kar! (tauba ka chautha zaboor)
1daaood ka zaboor. mooseeqee kay raahanuma kay liyay. yah geet us vaqt say mutaalliq hai jab daaood kay bat-saba kay saath zina karnay kay baad naatan nabee us kay paas aaya.
ai allaah, apnee shafqat kay mutaabiq mujh par meharbaanee kar, apnay baday rahem kay mutaabiq meree sarkashee kay daagh mita day.
2mujhay dho day taaki mera qusoor door ho jaaay, jo gunaah mujh say sarzad hua hai us say mujhay paak kar.
3kyoonki main apnee sarkashee ko maanta hoon, aur mera gunaah hamesha meray saamnay raheta hai.
4main nay teray, sirf teray hee khilaaf gunaah kiya, main nay vah kuchh kiya jo teree nazar men bura hai. kyoonki laazim hai ki too boltay vaqt raast thaheray aur adaalat kartay vaqt paakeeza saabit ho jaaay.
5yaqeenan main gunaah’aalooda haalat men paida hua. joon hee main maan kay pet men vujood men aaya to gunaahgaar tha.
6yaqeenan too baatin kee sachchaaee pasand karta aur posheedgee men mujhay hikmat kee taaleem deta hai.
7zoofa lay kar mujh say gunaah door kar taaki paak-saaf ho jaaoon. mujhay dho day taaki barf say ziyaada safed ho jaaoon.
8mujhay dubaara khushee aur shaadmaanee sunnay day taaki jin haddiyon ko too nay kuchal diya vah shaadiyaana bajaaen.
9apnay chiharay ko meray gunaahon say pher lay, mera tamaam qusoor mita day.
10ai allaah, meray andar paak dil paida kar, mujh men naay siray say saabitqadam rooh qaaim kar.
11mujhay apnay huzoor say khaarij na kar, na apnay muqaddas rooh ko mujh say door kar.
12mujhay dubaara apnee najaat kee khushee dila, mujhay mustaid rooh ata karkay sambhaalay rakh.
13tab main unhen teree raahon kee taaleem doonga jo tujh say bevafa ho gaay hain, aur gunaahgaar teray paas vaapas aaengay.
14ai allaah, meree najaat kay khuda, qatl ka qusoor mujh say door karkay mujhay bacha. tab meree zabaan teree raastee kee hamd-o-sana karegee.
15ai rabb, meray honton ko khol taaki mera munh teree sitaaish karay.
16kyoonki too zabah kee qurbaanee naheen chaahata, varna main vah pesh karta. bhasm honay vaalee qurbaaniyaan tujhay pasand naheen.
17allaah ko manzoor qurbaanee shikasta rooh hai. ai allaah, too shikasta aur kuchlay huay dil ko haqeer naheen jaanega.
18apnee meharbaanee ka izhaar karkay siyyoon ko khushhaalee bakhsh, yarooshalam kee faseel taameer kar.
19tab tujhay hamaaree saheeh qurbaaniyaan, hamaaree bhasm honay vaalee aur mukammal qurbaaniyaan pasand aaengee . tab teree qurbaangaah par bail chadhaaay jaaengay.