Zaboor 56
museebat men bharosaa
1daaood ka zaboor. mooseeqee kay raahanuma kay liyay. tarz : doordaraaz jazeeron ka kabootar. yah sunahera geet us vaqt say mutaalliq hai jab filistiyon nay usay jaat men pakad liya.
ai allaah, mujh par meharbaanee kar! kyoonki log mujhay tang kar rahay hain, ladnay vaala din bhar mujhay sata raha hai.
2din bhar meray dushman meray peechhay lagay hain, kyoonki vah bahut hain aur gharoor say mujh say lad rahay hain.
3lekin jab khauf mujhay apnee girift men lay lay to main tujh par hee bharosa rakhta hoon.
4allaah kay kalaam par mera fakhar hai, allaah par mera bharosa hai. main daroonga naheen, kyoonki faanee insaan mujhay kya nuqsaan pahuncha sakta hai?
5din bhar vah meray alfaaz ko tod-marod kar ghalat maanee nikaaltay, apnay tamaam mansoobon say mujhay zarar pahunchaana chaahatay hain.
6vah hamlaaaavar ho kar taak men baith jaatay aur meray har qadam par ghaur kartay hain. kyoonki vah mujhay maar daalnay par tulay huay hain.
7jo aisee shareer harkaten kartay hain, kya unhen bachna chaahiay? hargiz naheen! ai allaah, aqvaam ko ghussay men khaak men mila day.
8jitnay bhee din main beghar phira hoon un ka too nay poora hisaab rakha hai. ai allaah, meray aansoo apnay mashkeezay men daal lay! kya vah pahelay say teree kitaab men qalamband naheen hain? zaroor!
9phir jab main tujhay pukaaroonga to meray dushman mujh say baaz aaengay. yah main nay jaan liya hai ki allaah meray saath hai!
10allaah kay kalaam par mera fakhar hai, rabb kay kalaam par mera fakhar hai.
11allaah par mera bharosa hai. main daroonga naheen, kyoonki faanee insaan mujhay kya nuqsaan pahuncha sakta hai?
12ai allaah, teray huzoor main nay mannaten maanee hain, aur ab main tujhay shukrguzaaree kee qurbaaniyaan pesh karoonga.
13kyoonki too nay meree jaan ko maut say bachaaya aur meray paaon ko thokar khaanay say mahfooz rakha taaki zindagee kee raushnee men allaah kay huzoor chaloon.