Zaboor 58

intiqaam kee duaa

¹daaood ka sunahera geet. mooseeqee kay raahanuma kay liyay. tarz : tabaah na kar.

ay hukmraano, kya tum vaaqaee munsifaana faisla kartay, kya diyaanatdaaree say aadmazaadon kee adaalat kartay ho?

²hargiz naheen, tum dil men badee kartay aur mulk men apnay zaalim haathon kay liyay raasta banaatay ho.

³bedeen paidaaish say hee saheeh raah say door ho gaay hain, jhoot bolnay vaalay maan kay pet say hee bhatak gaay hain.

⁴vah saamp kee tarah zaher ugaltay hain, us baheray naag kee tarah jo apnay kaanon ko band kar rakhta hai

⁵taaki na jaadoogar kee aavaaz sunay, na maahir saperay kay mantr.

⁶ai allaah, un kay munh kay daant tod daal! ai rabb, javaan sherbabron kay jabday ko paash paash kar!

⁷vah us paanee kee tarah zaaay ho jaaen jo bah kar ghaaib ho jaata hai. un kay chalaaay huay teer beasar rahen.

⁸vah dhoop men ghongay kee maanind hon jo chalta chalta pighal jaata hai. un ka anjaam us bachchay ka sa ho jo maan kay pet men zaaay ho kar kabhee sooraj naheen dekhega.

⁹is say pahelay ki tumhaaree degen kaantedaar taheniyon kee aag mahsoos karen allaah un sab ko aandhee men uda kar lay jaaega.

¹⁰aakhirkaar dushman ko saza milegee. yah dekh kar raastbaaz khush hoga, aur vah apnay paaon ko bedeenon kay khoon men dho lega.

¹¹tab log kahengay, “vaaqaee raastbaaz ko ajr milta hai, vaaqaee allaah hai jo duniya men logon kee adaalat karta hai!”