Zaboor 59
dushman kay darmiyaan duaa
1daaood ka zaboor. mooseeqee kay raahanuma kay liyay. tarz : tabaah na kar. yah sunahera geet us vaqt say mutaalliq hai jab saaool nay apnay aadmiyon ko daaood kay ghar kee paheraadaaree karnay kay liyay bheja taaki jab mauqa milay usay qatl karen.
ai meray khuda, mujhay meray dushmanon say bacha. un say meree hifaazat kar jo meray khilaaf uthay hain.
2mujhay badkaaron say chhutkaara day, khoonkhwaaron say riha kar.
3dekh, vah meree taak men baithay hain. ai rabb, zabardast aadmee mujh par hamlaaaavar hain, haalaanki mujh say na khata huee na gunaah.
4main bequsoor hoon, taaham vah daud daud kar mujh say ladnay kee tayyaariyaan kar rahay hain. chunaanchay jaag uth, meree madad karnay a, jo kuchh ho raha hai us par nazar daal.
5ai rabb, lashkaron aur israaeel kay khuda, deegar tamaam qaumon ko saza denay kay liyay jaag uth! un sab par karam na farma jo shareer aur ghaddaar hain. (silaah)
6har shaam ko vah vaapas a jaatay aur kutton kee tarah bhaunktay huay shaher kee galiyon men ghoomtay phirtay hain.
7dekh, un kay munh say raal tapak rahee hai, un kay honton say talvaaren nikal rahee hain. kyoonki vah samajhtay hain, “kaun sunega?”
8lekin too ai rabb, un par hansta hai, too tamaam qaumon ka mazaaq udaata hai.
9ai meree quvvat, meree aankhen tujh par lagee rahengee, kyoonki allaah mera qil’a hai.
10mera khuda apnee meharbaanee kay saath mujh say milnay aaega, allaah bakhsh dega ki main apnay dushmanon kee shikast dekh kar khush hoonga.
11ai allaah hamaaree dhaal, unhen halaak na kar, varna meree qaum tera kaam bhool jaaegee. apnee qudrat ka izhaar yoon kar ki vah idhar udhar ladakhda kar gir jaaen.
12jo kuchh bhee un kay munh say nikalta hai vah gunaah hai, vah laanten aur jhoot hee sunaatay hain. chunaanchay unhen un kay takabbur kay jaal men phansnay day.
13ghussay men unhen tabaah kar! unhen yoon tabaah kar ki un ka naam-o-nishaan tak na rahay. tab log duniya kee intiha tak jaan lengay ki allaah yaaqoob kee aulaad par hukoomat karta hai. (silaah)
14har shaam ko vah vaapas a jaatay aur kutton kee tarah bhaunktay huay shaher kee galiyon men ghoomtay phirtay hain.
15vah idhar udhar gasht laga kar khaanay kee cheezen dhoondtay hain. agar pet na bharay to ghurraatay rahetay hain.
16lekin main teree qudrat kee madahsaraaee karoonga, subah ko khushee kay naaray laga kar teree shafqat kee sitaaish karoonga. kyoonki too mera qil’a aur museebat kay vaqt meree panaahgaah hai.
17ai meree quvvat, main teree madahsaraaee karoonga, kyoonki allaah mera qil’a aur mera meharbaan khuda hai.