Zaboor 6
museebat men dua (tauba ka pahela zaboor)
1daaood ka zaboor. mooseeqee kay raahanuma kay liyay. taardaar saazon kay saath gaana hai.
ai rabb, ghussay men mujhay saza na day, taish men mujhay tambeeh na kar.
2ai rabb, mujh par rahem kar, kyoonki main nidhaal hoon. ai rabb, mujhay shifa day, kyoonki meray aaza dahshatzada hain.
3meree jaan nihaayat khaufzada hai. ai rabb, too kab tak der karega?
4ai rabb, vaapas a kar meree jaan ko bacha. apnee shafqat kee khaatir mujhay chhutkaara day.
5kyoonki murda tujhay yaad naheen karta. paataal men kaun teree sitaaish karega?
6main karaahatay karaahatay thak gaya hoon. pooree raat ronay say bistar bheeg gaya hai, meray aansooon say palang gal gaya hai.
7gham kay maaray meree aankhen sooj gaee hain, meray mukhaalifon kay hamlon say vah zaaay hotee ja rahee hain.
8ai badkaaro, mujh say door ho jaao, kyoonki rabb nay meree aah-o-buka sunee hai.
9rabb nay meree iltijaaon ko sun liya hai, meree dua rabb ko qabool hai.
10meray tamaam dushmanon kee rusvaaee ho jaaegee, aur vah sakht ghabra jaaengay. vah mud kar achaanak hee sharminda ho jaaengay.