Zaboor 61

door say darakhwaast

¹daaood ka zaboor. mooseeqee kay raahanuma kay liyay. taardaar saaz kay saath gaana hai.

ai allaah, meree aah-o-zaaree sun, meree dua par tavajjuh day.

²main tujhay duniya kee intiha say pukaar raha hoon, kyoonki mera dil nidhaal ho gaya hai. meree raahanumaaee karkay mujhay us chataan par pahuncha day jo mujh say buland hai.

³kyoonki too meree panaahgaah raha hai, ek mazboot burj jis men main dushman say mahfooz hoon.

⁴main hamesha kay liyay teray khaimay men rahena, teray paron talay panaah lena chaahata hoon. (silaah)

⁵kyoonki ai allaah, too nay meree mannaton par dhyaan diya, too nay mujhay vah meeraas bakhshee jo un sab ko miltee hai jo tera khauf maantay hain.

⁶baadshaah ko umr kee daraazee bakhsh day. vah pusht-dar-pusht jeeta rahay.

⁷vah hamesha tak allaah kay huzoor takhtnasheen rahay. shafqat aur vafaadaaree us kee hifaazat karen.

⁸tab main hamesha tak teray naam kee madahsaraaee karoonga, roz-ba-roz apnee mannaten pooree karoonga.