Zaboor 62

khaamoshee say allaah ka intizaar kar

¹daaood ka zaboor. mooseeqee kay raahanuma kay liyay. yadootoon kay liyay.

meree jaan khaamoshee say allaah hee kay intizaar men hai. usee say mujhay madad miltee hai.

²vahee meree chataan, meree najaat aur mera qil’a hai, is liyay main ziyaada naheen dagmagaaoonga.

³tum kab tak us par hamla karogay jo pahelay hee jhukee huee deevaar kee maanind hai? tum sab kab tak usay qatl karnay par tulay rahogay jo pahelay hee girnay vaalee chaardeevaaree jaisa hai?

⁴un kay mansoobon ka ek hee maqsad hai, ki usay us kay oonchay uhday say utaaren. unhen jhoot say maza aata hai. munh say vah barkat detay, lekin andar hee andar laanat kartay hain. (silaah)

⁵lekin too ai meree jaan, khaamoshee say allaah hee kay intizaar men rah. kyoonki usee say mujhay ummeed hai.

⁶sirf vahee meree jaan kee chataan, meree najaat aur mera qil’a hai, is liyay main naheen dagmagaaoonga.

⁷meree najaat aur izzat allaah par mabnee hai, vahee meree mahfooz chataan hai. allaah men main panaah leta hoon.

⁸ai ummat, har vaqt us par bharosa rakh! us kay huzoor apnay dil ka ranj-o-alam paanee kee tarah undel day. allaah hee hamaaree panaahgaah hai. (silaah)

⁹insaan dam bhar ka hee hai, aur baday log fareb hee hain. agar unhen taraazoo men tola jaaay to mil kar un ka vazan ek phoonk say bhee kam hai.

¹⁰zulm par etimaad na karo, choree karnay par fuzool ummeed na rakho. aur agar daulat badh jaaay to tumhaara dil us say lipat na jaaay.

¹¹allaah nay ek baat farmaaee balki do baar main nay sunee hai ki allaah hee qaadir hai.

¹²ai rabb, yaqeenan too meharbaan hai, kyoonki too har ek ko us kay aamaal ka badla deta hai.