Zaboor 63
allaah kay liyay aarzoo
1daaood ka zaboor. yah us vaqt say mutaalliq hai jab vah yahoodaah kay registaan men tha.
ai allaah, too mera khuda hai jisay main dhoondta hoon. meree jaan teree piyaasee hai, mera poora jism teray liyay tarasta hai. main us khushk aur nidhaal mulk kee maanind hoon jis men paanee naheen hai.
2chunaanchay main maqdis men tujhay dekhnay kay intizaar men raha taaki teree qudrat aur jalaal ka mushaahada karoon.
3kyoonki teree shafqat zindagee say kaheen behatar hai, meray hont teree madahsaraaee karengay.
4chunaanchay main jeetay jee teree sitaaish karoonga, tera naam lay kar apnay haath uthaaoonga.
5meree jaan umda ghiza say ser ho jaaegee, mera munh khushee kay naaray laga kar teree hamd-o-sana karega.
6bistar par main tujhay yaad karta, pooree raat kay dauraan teray baaray men sochta raheta hoon.
7kyoonki too meree madad karnay aaya, aur main teray paron kay saay men khushee kay naaray lagaata hoon.
8meree jaan teray saath liptee rahetee, aur tera dahena haath mujhay sambhaalta hai.
9lekin jo meree jaan lenay par tulay huay hain vah tabaah ho jaaengay, vah zameen kee gaheraaiyon men utar jaaengay.
10unhen talvaar kay havaalay kiya jaaega, aur vah geeddon kee khuraak ban jaaengay.
11lekin baadshaah allaah kee khushee manaaega. jo bhee allaah kee qasam khaata hai vah fakhar karega, kyoonki jhoot bolnay vaalon kay munh band ho jaaengay.