Zaboor 64

shareeat kay posheeda hamlon say hifaazat kee duaa

¹daaood ka zaboor. mooseeqee kay raahanuma kay liyay.

ai allaah, sun jab main apnee aah-o-zaaree pesh karta hoon. meree zindagee dushman kee dahshat say mahfooz rakh.

²mujhay badam’aashon kee saazishon say chhupaaay rakh, un kee halchal say jo ghalat kaam kartay hain.

³vah apnee zabaan ko talvaar kee tarah tez kartay aur apnay zahereelay alfaaz ko teeron kee tarah tayyaar rakhtay hain

⁴taaki taak men baith kar unhen bequsoor par chalaaen. vah achaanak aur bebaakee say unhen us par barsa detay hain.

⁵vah bura kaam karnay men ek doosray kee hausalaaafzaaee kartay, ek doosray say mashvra letay hain ki ham apnay phanday kis tarah chhupa kar lagaaen? vah kahetay hain, “yah kisee ko bhee nazar naheen aaengay.”

⁶vah badee baareekee say buray mansoobon kee tayyaariyaan kartay, phir kahetay hain, “chalo, baat ban gaee hai, mansooba soch-bichaar kay baad tayyaar hua hai.” yaqeenan insaan kay baatin aur dil kee tah tak pahunchna mushkil hee hai.

⁷lekin allaah un par teer barasaaega, aur achaanak hee vah zakhmee ho jaaengay.

⁸vah apnee hee zabaan say thokar kha kar gir jaaengay. jo bhee unhen dekhega vah “tauba tauba” kahega.

⁹tab tamaam log khauf kha kar kahengay, “allaah hee nay yah kiya!” unhen samajh aaegee ki yah usee ka kaam hai.

¹⁰raastbaaz allaah kee khushee mana kar us men panaah lega, aur jo dil say diyaanatdaar hain vah sab fakhar karengay.