Zaboor 66
allaah kee mojizaana madad kee taareef
1mooseeqee kay raahanuma kay liyay. zaboor. geet.
ai saaree zameen, khushee kay naaray laga kar allaah kee madahsaraaee kar!
2us kay naam kay jalaal kee tamjeed karo, us kee sitaaish urooj tak lay jaao!
3allaah say kaho, “teray kaam kitnay purjalaal hain. teree badee qudrat kay saamnay teray dushman dabak kar teree khushaamad karnay lagtay hain.
4tamaam duniya tujhay sijda karay! vah teree taareef men geet gaaay, teray naam kee sitaaish karay.” (silaah)
5aao, allaah kay kaam dekho! aadamzaad kee khaatir us nay kitnay purjalaal mojizay kiay hain!
6us nay samundar ko khushk zameen men badal diya. jahaan pahelay paanee ka tez bahaao tha vahaan say log paidal hee guzray. chunaanchay aao, ham us kee khushee manaaen.
7apnee qudrat say vah abad tak hukoomat karta hai. us kee aankhen qaumon par lagee rahetee hain taaki sarkash us kay khilaaf na uthen. (silaah)
8ai ummato, hamaaray khuda kee hamd karo. us kee sitaaish door tak sunaaee day.
9kyoonki vah hamaaree zindagee qaaim rakhta, hamaaray paaon ko dagmagaanay naheen deta.
10kyoonki ai allaah, too nay hamen aazmaaya. jis tarah chaandee ko pighla kar saaf kiya jaata hai usee tarah too nay hamen paak-saaf kar diya hai.
11too nay hamen jaal men phansa diya, hamaaree kamar par aziyatanaak bojh daal diya.
12too nay logon kay rathon ko hamaaray saron par say guzarnay diya, aur ham aag aur paanee kee zad men a gaay. lekin phir too nay hamen museebat say nikaal kar faraavaanee kee jagah pahunchaaya.
13main bhasm honay vaalee qurbaaniyaan lay kar teray ghar men aaoonga aur teray huzoor apnee mannaten pooree karoonga,
14vah mannaten jo meray munh nay museebat kay vaqt maanee theen.
15bhasm honay vaalee qurbaanee kay taur par main tujhay motee-taazee bheden aur mendhon ka dhuaan pesh karoonga, saath saath bail aur bakray bhee chadhaaoonga. (silaah)
16ai allaah ka khauf maannay vaalo, aao aur suno! jo kuchh allaah nay meree jaan kay liyay kiya vah tumhen sunaaoonga.
17main nay apnay munh say usay pukaara, lekin meree zabaan us kee taareef karnay kay liyay tayyaar thee.
18agar main dil men gunaah kee parvarish karta to rabb meree na sunta.
19lekin yaqeenan rabb nay meree sunee, us nay meree iltija par tavajjuh dee.
20allaah kee hamd ho, jis nay na meree dua radd kee, na apnee shafqat mujh say baaz rakhee.