Zaboor 68

allaah kee fatah

¹daaood ka zaboor. mooseeqee kay raahanuma kay liyay geet.

allaah uthay to us kay dushman tittar-bittar ho jaaengay, us say nafrat karnay vaalay us kay saamnay say bhaag jaaengay.

²vah dhuen kee tarah bikhar jaaengay. jis tarah mom aag kay saamnay pighal jaata hai usee tarah bedeen allaah kay huzoor halaak ho jaaengay.

³lekin raastbaaz khush-o-khurram hongay, vah allaah kay huzoor jashn mana kar phoolay na samaaengay.

⁴allaah kee taazeem men geet gaao, us kay naam kee madahsaraaee karo! jo rath par savaar biyaabaan men say guzar raha hai us kay liyay raasta tayyaar karo. rabb us ka naam hai, us kay huzoor khushee manaao!

⁵allaah apnee muqaddas sukoonatgaah men yateemon ka baap aur bevaaon ka haamee hai.

⁶allaah begharon ko gharon men basa deta aur qaidiyon ko qaid say nikaal kar khushhaalee ata karta hai. lekin jo sarkash hain vah jhulsay huay mulk men rahengay.

⁷ai allaah, jab too apnee qaum kay aagay aagay nikla, jab too registaan men qadam-ba-qadam aagay badha (silaah)

⁸to zameen laraz uthee aur aasmaan say baarish tapaknay lagee. haan, allaah kay huzoor jo koh-ay-seena aur israaeel ka khuda hai aisa hee hua.

⁹ai allaah, too nay kasrat kee baarish barasnay dee. jab kabhee tera mauroosee mulk nidhaal hua to too nay usay taazaadam kiya.

¹⁰yoon teree qaum us men aabaad huee. ai allaah, apnee bhalaaee say too nay usay zarooratmandon kay liyay tayyaar kiya.

¹¹rabb farmaan saadir karta hai to khushkhabaree sunaanay vaalee aurton ka bada lashkar nikalta hai,

¹²“faujon kay baadshaah bhaag rahay hain. vah bhaag rahay hain aur aurten loot ka maal taqseem kar rahee hain.

¹³tum kyoon apnay zeen kay do boron kay darmiyaan baithay rahetay ho? dekho, kabootar kay paron par chaandee aur us kay shaahaparon par peela sona chadhaaya gaya hai.”

¹⁴jab qaadir-ay-mutlaq nay vahaan kay baadshaahon ko muntashir kar diya to koh-ay-zalmon par barf padee.

¹⁵koh-ay-basan ilaahee pahaad hai, koh-ay-basan kee mut’addid chotiyaan hain.

¹⁶ai pahaad kee mut’addid chotiyo, tum us pahaad ko kyoon rashak kee nigaah say dekhtee ho jisay allaah nay apnee sukoonatgaah kay liyay pasand kiya hai? yaqeenan rabb vahaan hamesha kay liyay sukoonat karega.

¹⁷allaah kay beshumaar rath aur anaginat faujee hain. khudaavand un kay darmiyaan hai, seena ka khuda maqdis men hai.

¹⁸too nay bulandee par chadh kar qaidiyon ka hujoom giriftaar kar liya, tujhay insaanon say tuhfay milay, un say bhee jo sarkash ho gaay thay. yoon hee rabb khuda vahaan sukoonatpazeer hua.

¹⁹rabb kee tamjeed ho jo roz-ba-roz hamaara bojh uthaaay chalta hai. allaah hamaaree najaat hai. (silaah)

²⁰hamaara khuda vah khuda hai jo hamen baar baar najaat deta hai, rabb qaadir-ay-mutlaq hamen baar baar maut say bachnay kay raastay muhayya karta hai.

²¹yaqeenan allaah apnay dushmanon kay saron ko kuchal dega. jo apnay gunaahon say baaz naheen aata us kee khopdee vah paash paash karega.

²²rabb nay farmaaya, “main unhen basan say vaapas laaoonga, samundar kee gaheraaiyon say vaapas pahunchaaoonga.

²³tab too apnay paaon ko dushman kay khoon men dho lega, aur teray kuttay usay chaat lengay.”

²⁴ai allaah, teray juloos nazar a gaay hain, meray khuda aur baadshaah kay juloos maqdis men daakhil hotay huay nazar a gaay hain.

²⁵aagay gulookaar, phir saaz bajaanay vaalay chal rahay hain. un kay aas-paas kunvaariyaan daf bajaatay huay phir rahee hain.

²⁶“jamaaaton men allaah kee sitaaish karo! jitnay bhee israaeel kay sarchashmay say niklay huay ho rabb kee tamjeed karo!”

²⁷vahaan sab say chhota bhaaee binyameen aagay chal raha hai, phir yahoodaah kay buzurgon ka purshor hujoom zabooloon aur naftaalee kay buzurgon kay saath chal raha hai.

²⁸ai allaah, apnee qudrat ba-roo-ay kaar la! ai allaah, jo qudrat too nay pahelay bhee hamaaree khaatir dikhaaee usay dubaara dikha!

²⁹usay yarooshalam kay oopar apnee sukoonatgaah say dikha. tab baadshaah teray huzoor tuhfay laaengay.

³⁰sarkandon men chhupay huay darinday ko malaamat kar! saandon ka jo ghol bachhdon jaisee qaumon men raheta hai usay daant! unhen kuchal day jo chaandee ko piyaar kartay hain. un qaumon ko muntashir kar jo jang karnay say lutf’andoz hotee hain.

³¹misr say safeer aaengay, ethopiya apnay haath allaah kee taraf uthaaega.

³²ai duniya kee saltanato, allaah kee taazeem men geet gaao! rabb kee madahsaraaee karo (silaah)

³³jo apnay rath par savaar ho kar qadeem zamaanay kay bulandtareen aasmaanon men say guzarta hai. suno us kee aavaaz jo zor say garaj raha hai.

³⁴allaah kee qudrat ko tasleem karo! us kee azmat israaeel par chhaaee rahetee aur us kee qudrat aasmaan par hai.

³⁵ai allaah, too apnay maqdis say zaahir hotay vaqt kitna maheeb hai. israaeel ka khuda hee qaum ko quvvat aur taaqat ata karta hai. allaah kee tamjeed ho