Zaboor 69
aazmaaish say najaat kee duaa
1daaood ka zaboor. tarz : sosan kay phool. mooseeqee kay raahanuma kay liyay.
ai allaah, mujhay bacha! kyoonki paanee meray galay tak pahunch gaya hai.
2main gaheree daldal men dhans gaya hoon, kaheen paaon jamaanay kee jagah naheen miltee. main paanee kee gaheraaiyon men a gaya hoon, sailaab mujh par ghaalib a gaya hai.
3main chillaatay chillaatay thak gaya hoon. mera gala baith gaya hai. apnay khuda ka intizaar kartay kartay meree aankhen dhundala gaeen.
4jo bilaavajah mujh say keena rakhtay hain vah meray sar kay baalon say ziyaada hain, jo besabab meray dushman hain aur mujhay tabaah karna chaahatay hain vah taaqatvar hain. jo kuchh main nay naheen loota usay mujh say talab kiya jaata hai.
5ai allaah, too meree hamaaqat say vaaqif hai, mera qusoor tujh say posheeda naheen hai.
6ai qaadir-ay-mutlaq rabb-ul-afwaaj, jo teray intizaar men rahetay hain vah meray baais sharminda na hon. ai israaeel kay khuda, meray baais teray taalib kee rusvaaee na ho.
7kyoonki teree khaatir main sharmindagee bardaasht kar raha hoon, teree khaatir mera chihara sharmasaar hee raheta hai.
8main apnay sagay bhaaiyon kay nazdeek ajnabee aur apnee maan kay beton kay nazdeek pardesee ban gaya hoon.
9kyoonki teray ghar kee ghairat mujhay kha gaee hai, jo tujhay gaaliyaan detay hain un kee gaaliyaan mujh par a gaee hain.
10jab main roza rakh kar rota tha to log mera mazaaq udaatay thay.
11jab maatmee libaas pahenay phirta tha to un kay liyay ibrat’angez misaal ban gaya.
12jo buzurg shaher kay darvaazay par baithay hain vah meray baaray men gappen haanktay hain. sharaabee mujhay apnay tanz bharay geeton ka nishaana banaatay hain.
13lekin ai rabb, meree tujh say dua hai ki main tujhay dubaara manzoor ho jaaoon. ai allaah, apnee azeem shafqat kay mutaabiq meree sun, apnee yaqeenee najaat kay mutaabiq mujhay bacha.
14mujhay daldal say nikaal taaki gharq na ho jaaoon. mujhay un say chhutkaara day jo mujh say nafrat kartay hain. paanee kee gaheraaiyon say mujhay bacha.
15sailaab mujh par ghaalib na aaay, samundar kee gaheraaee mujhay hadap na kar lay, gadha meray oopar apna munh band na kar lay.
16ai rabb, meree sun, kyoonki teree shafqat bhalee hai. apnay azeem rahem kay mutaabiq meree taraf rujoo kar.
17apna chihara apnay khaadim say chhupaaay na rakh, kyoonki main museebat men hoon. jaldee say meree sun!
18qareeb a kar meree jaan ka fidya day, meray dushmanon kay sabab say ivzaana day kar mujhay chhuda.
19too meree rusvaaee, meree sharmindagee aur tazleel say vaaqif hai. teree aankhen meray tamaam dushmanon par lagee rahetee hain.
20un kay taanon say mera dil toot gaya hai, main beemaar pad gaya hoon. main hamdardee kay intizaar men raha, lekin befaaida. main nay tavaqqo kee ki koee mujhay dilaasa day, lekin ek bhee na mila.
21unhon nay meree khuraak men kadva zaher milaaya, mujhay sirka pilaaya jab piyaasa tha.
22un kee mez un kay liyay phanda aur un kay saathiyon kay liyay jaal ban jaaay.
23un kee aankhen taareek ho jaaen taaki vah dekh na saken. un kee kamar hamesha tak dagmagaatee rahay.
24apna poora ghussa un par utaar, tera sakht ghazab un par a paday.
25un kee rihaaishgaah sunsaan ho jaaay aur koee un kay khaimon men aabaad na ho,
26kyoonki jisay too hee nay saza dee usay vah sataatay hain, jisay too hee nay zakhmee kiya us ka dukh doosron ko suna kar khush hotay hain.
27un kay qusoor ka sakhtee say hisaab-kitaab kar, vah teray saamnay raastbaaz na thaheren.
28unhen kitaab-ay-hayaat say mitaaya jaaay, un ka naam raastbaazon kee faherist men darj na ho.
29haay, main museebat men phansa hua hoon, mujhay bahut dard hai. ai allaah, teree najaat mujhay mahfooz rakhay.
30main allaah kay naam kee madahsaraaee karoonga, shukrguzaaree say us kee taazeem karoonga.
31yah rabb ko bail ya seeng aur khur rakhnay vaalay saand say kaheen ziyaada pasand aaega.
32haleem allaah ka kaam dekh kar khush ho jaaengay. ai allaah kay taalibo, tasallee paao!
33kyoonki rabb muhtaajon kee sunta aur apnay qaidiyon ko haqeer naheen jaanta.
34aasmaan-o-zameen us kee tamjeed karen, samundar aur jo kuchh us men harkat karta hai us kee sitaaish karay.
35kyoonki allaah siyyoon ko najaat day kar yahoodaah kay shaheron ko taameer karega, aur us kay khaadim un par qabza karkay un men aabaad ho jaaengay.
36un kee aulaad mulk ko meeraas men paaegee, aur us kay naam say muhabbat rakhnay vaalay us men basay rahengay.