Zaboor 7

insaaf kay liyay duaa

¹daaood ka vah maatmee geet jo us nay koosh binymeenee kee baaton par rabb kee tamjeed men gaaya.

ai rabb meray khuda, main tujh men panaah leta hoon. mujhay un sab say bacha kar chhutkaara day jo mera taaqqub kar rahay hain,

²varna vah sherbabar kee tarah mujhay phaad kar tukday tukday kar dengay, aur bachaanay vaala koee naheen hoga.

³ai rabb meray khuda, agar mujh say yah kuchh sarzad hua aur meray haath qusoorvaar hon,

⁴agar main nay us say bura sulook kiya jis ka meray saath jhagda naheen tha ya apnay dushman ko khwaah-m-khwaah loot liya ho

⁵to phir mera dushman meray peechhay pad kar mujhay pakad lay. vah meree jaan ko mittee men kuchal day, meree izzat ko khaak men milaaay. (silaah)

⁶ai rabb, uth aur apna ghazab dikha! meray dushmanon kay taish kay khilaaf khada ho ja. meree madad karnay kay liyay jaag uth! too nay khud adaalat ka hukm diya hai.

⁷aqvaam teray ird-gird jama ho jaaen jab too un kay oopar bulandiyon par takhtnasheen ho jaaay.

⁸rabb aqvaam kee adaalat karta hai. ai rabb, meree raastbaazee aur begunaahee ka lihaaz karkay mera insaaf kar.

⁹ai raast khuda, jo dil kee gaheraaiyon ko tah tak jaanch leta hai, bedeenon kee sharaaraten khatm kar aur raastbaaz ko qaaim rakh.

¹⁰allaah meree dhaal hai. jo dil say seedhee raah par chaltay hain unhen vah rihaaee deta hai.

¹¹allaah aadil munsif hai, aisa khuda jo rozaana logon kee sarzanish karta hai.

¹²yaqeenan is vaqt bhee dushman apnee talvaar ko tez kar raha, apnee kamaan ko taan kar nishaana baandh raha hai.

¹³lekin jo muhalak hathiyaar aur jaltay huay teer us nay tayyaar kar rakhay hain un kee zad men vah khud hee a jaaega.

¹⁴dekh, buraaee ka beej us men ug aaya hai. ab vah sharaarat say haamila ho kar phirta aur jhoot kay bachchay janm deta hai.

¹⁵lekin jo gadha us nay doosron ko phansaanay kay liyay khod khod kar tayyaar kiya us men khud gir pada hai.

¹⁶vah khud apnee sharaarat kee zad men aaega, us ka zulm us kay apnay sar par naazil hoga.

¹⁷main rabb kee sitaaish karoonga, kyoonki vah raast hai. main rabb t’aala kay naam kee taareef men geet gaaoonga.