Zaboor 71
hifaazat kay liyay duaa
1ai rabb, main nay tujh men panaah lee hai. mujhay kabhee sharminda na honay day.
2apnee raastee say mujhay bacha kar chhutkaara day. apna kaan meree taraf jhuka kar mujhay najaat day.
3meray liyay chataan par mahfooz ghar ho jis men main har vaqt panaah lay sakoon. too nay farmaaya hai ki mujhay najaat dega, kyoonki too hee meree chataan aur mera qil’a hai.
4ai meray khuda, mujhay bedeen kay haath say bacha, us kay qabzay say jo beinsaaf aur zaalim hai.
5kyoonki too hee meree ummeed hai. ai rabb qaadir-ay-mutlaq, too meree javaanee hee say mera bharosa raha hai.
6paidaaish say hee main nay tujh par takiya kiya hai, maan kay pet say too nay mujhay sambhaala hai. main hamesha teree hamd-o-sana karoonga.
7bahuton kay nazdeek main badashugoonee hoon, lekin too meree mazboot panaahgaah hai.
8din bhar mera munh teree tamjeed aur taazeem say labrez raheta hai.
9budhaapay men mujhay radd na kar, taaqat kay khatm honay par mujhay tark na kar.
10kyoonki meray dushman meray baaray men baaten kar rahay hain, jo meree jaan kee taak lagaaay baithay hain vah ek doosray say salaah-mashvra kar rahay hain.
11vah kahetay hain, “allaah nay usay tark kar diya hai. us kay peechhay pad kar usay pakdo, kyoonki koee naheen jo usay bachaaay.”
12ai allaah, mujh say door na ho. ai meray khuda, meree madad karnay men jaldee kar.
13meray hareef sharminda ho kar fana ho jaaen, jo mujhay nuqsaan pahunchaanay kay darpai hain vah laan-taan aur rusvaaee talay dab jaaen.
14lekin main hamesha teray intizaar men rahoonga, hamesha teree sitaaish karta rahoonga.
15mera munh teree raastee sunaata rahega, saara din teray najaatabakhsh kaamon ka zikr karta rahega, go main un kee pooree taadaad gin bhee naheen sakta.
16main rabb qaadir-ay-mutlaq kay azeem kaam sunaatay huay aaoonga, main teree, sirf teree hee raastee yaad karoonga.
17ai allaah, too meree javaanee say mujhay taaleem deta raha hai, aur aaj tak main teray mojizaat ka elaan karta aaya hoon.
18ai allaah, khwaah main boodha ho jaaoon aur meray baal safed ho jaaen mujhay tark na kar jab tak main aanay vaalee pusht kay tamaam logon ko teree quvvat aur qudrat kay baaray men bata na loon.
19ai allaah, teree raastee aasmaan say baaten kartee hai. ai allaah, tujh jaisa kaun hai jis nay itnay azeem kaam kiay hain?
20too nay mujhay mut’addid talkh tajribon men say guzarnay diya hai, lekin too mujhay dubaara zinda bhee karega, too mujhay zameen kee gaheraaiyon men say vaapas laaega.
21mera rutba badha day, mujhay dubaara tasallee day.
22ai meray khuda, main sitaar baja kar teree sitaaish aur teree vafaadaaree kee tamjeed karoonga. ai israaeel kay quddoos, main sarod baja kar teree taareef men geet gaaoonga.
23jab main teree madahsaraaee karoonga to meray hont khushee kay naaray lagaaengay, aur meree jaan jisay too nay fidya day kar chhudaaya hai shaadiyaana bajaaygee.
24meree zabaan bhee din bhar teree raastee bayaan karegee, kyoonki jo mujhay nuqsaan pahunchaana chaahatay thay vah sharmasaar aur rusva ho gaay hain.