Zaboor 72
salaamatee ka baadshaah
1sulemaan ka zaboor.
ai allaah, baadshaah ko apna insaaf ata kar, baadshaah kay betay ko apnee raastee bakhsh de
2taaki vah raastee say teree qaum aur insaaf say teray museebatazadon kee adaalat karay.
3pahaad qaum ko salaamatee aur pahaadiyaan raastee pahunchaaen.
4vah qaum kay museebatazadon ka insaaf karay aur muhtaajon kee madad karkay zaalimon ko kuchal day.
5tab log pusht-dar-pusht tera khauf maanengay jab tak sooraj chamkay aur chaand raushnee day.
6vah katee huee ghaas kay khet par barasnay vaalee baarish kee tarah utar aaay, zameen ko tar karnay vaalee bauchhaadon kee tarah naazil ho jaaay.
7us kay daur-ay-hukoomat men raastbaaz phalay phoolega, aur jab tak chaand nest na ho jaaay salaamatee ka ghalba hoga.
8vah ek samundar say doosray samundar tak aur darya-ay-furaat say duniya kee intiha tak hukoomat karay.
9registaan kay baashinday us kay saamnay jhuk jaaen, us kay dushman khaak chaaten.
10tarsees aur saahilee ilaaqon kay baadshaah usay kharaaj pahunchaaen, saba aur siba usay baaj pesh karen.
11tamaam baadshaah usay sijda karen, sab aqvaam us kee khidmat karen.
12kyoonki jo zarooratmand madad kay liyay pukaaray usay vah chhutkaara dega, jo museebat men hai aur jis kee madad koee naheen karta usay vah rihaaee dega.
13vah pastahaalon aur ghareebon par taras khaaega, muhtaajon kee jaan ko bachaaega.
14vah ivzaana day kar unhen zulm-o-tashaddud say chhudaaega, kyoonki un ka khoon us kee nazar men qeemtee hai.
15baadshaah zindaabaad! saba ka sona usay diya jaaay. log hamesha us kay liyay dua karen, din bhar us kay liyay barkat chaahen.
16mulk men anaaj kee kasrat ho, pahaadon kee chotiyon par bhee us kee faslen lahelahaaen. us ka phal lubnaan kay phal jaisa umda ho, shaheron kay baashinday hariyaalee kee tarah phalen phoolen.
17baadshaah ka naam abad tak qaaim rahay, jab tak sooraj chamkay us ka naam phalay phoolay. tamaam aqvaam us say barkat paaen, aur vah usay mubaarak kahen.
18rabb khuda kee tamjeed ho jo israaeel ka khuda hai. sirf vahee mojizay karta hai!
19us kay jalaalee naam kee abad tak tamjeed ho, pooree duniya us kay jalaal say bhar jaaay. aameen, phir aameen.
20yahaan daaood bin yassee kee duaaen khatm hotee hain.