teesree kitaab 73-89

bedeenon kee kaamyaabee kay baavujood tasallee

¹aasaf ka zaboor.

yaqeenan allaah israaeel par meharbaan hai, un par jin kay dil paak hain.

²lekin main phisalnay ko tha, meray qadam laghzish khaanay ko thay.

³kyoonki shekheebaazon ko dekh kar main bechain ho gaya, is liyay ki bedeen itnay khushhaal hain.

⁴martay vaqt un ko koee takleef naheen hotee, aur un kay jism motay-taazay rahetay hain.

⁵aam logon kay masaail say un ka vaasta naheen padta. jis dard-o-karab men doosray mubtala rahetay hain us say vah aazaad hotay hain.

⁶is liyay un kay galay men takabbur ka haar hai, vah zulm ka libaas pahenay phirtay hain.

⁷charbee kay baais un kee aankhen ubhar aaee hain. un kay dil belagaam vahemon kee girift men rahetay hain.

⁸vah mazaaq uda kar buree baaten kartay hain, apnay gharoor men zulm kee dhamkiyaan detay hain.

⁹vah samajhtay hain ki jo kuchh hamaaray munh say nikalta hai vah aasmaan say hai, jo baat hamaaree zabaan par a jaatee hai vah pooree zameen kay liyay ahemiyat rakhtee hai.

¹⁰chunaanchay avaam un kee taraf rujoo hotay hain, kyoonki un kay haan kasrat ka paanee piya jaata hai.

¹¹vah kahetay hain, “allaah ko kya pata hai? allaah t’aala ko ilm hee naheen.”

¹²dekho, yahee hai bedeenon ka haal. vah hamesha sukoon say rahetay, hamesha apnee daulat men izaafa kartay hain.

¹³yaqeenan main nay befaaida apna dil paak rakha aur abas apnay haath ghalat kaam karnay say baaz rakhay.

¹⁴kyoonki din bhar main dard-o-karab men mubtala raheta hoon, har subah mujhay saza dee jaatee hai.

¹⁵agar main kaheta, “main bhee un kee tarah boloonga,” to teray farzandon kee nasal say ghaddaaree karta.

¹⁶main soch-bichaar men pad gaya taaki baat samjhoon, lekin sochtay sochtay thak gaya, aziyat men sirf izaafa hua.

¹⁷tab main allaah kay maqdis men daakhil ho kar samajh gaya ki un ka anjaam kya hoga.

¹⁸yaqeenan too unhen phisalnee jagah par rakhega, unhen fareb men phansa kar zameen par patakh dega.

¹⁹achaanak hee vah tabaah ho jaaengay, dahshatanaak museebat men phans kar mukammal taur par fana ho jaaengay.

²⁰ai rabb, jis tarah khwaab jaag uthtay vaqt ghairhaqeeqee saabit hota hai usee tarah too uthtay vaqt unhen vahem qaraar day kar haqeer jaanega.

²¹jab meray dil men talkhee paida huee aur meray baatin men sakht dard thaa

²²to main ahemaq tha. main kuchh naheen samajhta tha balki teray saamnay maveshee kee maanind tha.

²³to bhee main hamesha teray saath lipta rahoonga, kyoonki too mera dahena haath thaamay rakhta hai.

²⁴too apnay mashvray say meree qiyaadat karkay aakhir men izzat kay saath mera khairamaqdam karega.

²⁵jab too meray saath hai to mujhay aasmaan par kya kamee hogee? jab too meray saath hai to main zameen kee koee bhee cheez naheen chaahoonga.

²⁶khwaah mera jism aur mera dil javaab day jaaen, lekin allaah hamesha tak meray dil kee chataan aur meree meeraas hai.

²⁷yaqeenan jo tujh say door hain vah halaak ho jaaengay, jo tujh say bevafa hain unhen too tabaah kar dega.

²⁸lekin meray liyay allaah kee qurbat sab kuchh hai. main nay rabb qaadir-ay-mutlaq ko apnee panaahgaah banaaya hai, aur main logon ko teray tamaam kaam sunaaoonga.