Zaboor 74
rabb kay ghar kee behuramtee par afsos
1aasaf ka zaboor. hikmat ka geet.
ai allaah, too nay hamen hamesha kay liyay kyoon radd kiya hai? apnee charaagaah kee bhedon par tera qaher kyoon bhadakta raheta hai?
2apnee jamaaat ko yaad kar jisay too nay qadeem zamaanay men khareeda aur ivzaana day kar chhudaaya taaki teree meeraas ka qabeela ho. koh-ay-siyyoon ko yaad kar jis par too sukoonatpazeer raha hai.
3apnay qadam in daaimee khandaraat kee taraf badha. dushman nay maqdis men sab kuchh tabaah kar diya hai.
4teray mukhaalifon nay garajtay huay teree jalsaagaah men apnay nishaan gaad diay hain.
5unhon nay gunjaan jangal men lakkadahaaron kee tarah apnay kulhaaday chalaaay,
6apnay kulhaadon aur kudaalon say us kee tamaam kandaakaaree ko tukday tukday kar diya hai.
7unhon nay teray maqdis ko bhasm kar diya, farsh tak teray naam kee sukoonatgaah kee behuramtee kee hai.
8apnay dil men vah bolay, “aao, ham un sab ko khaak men milaaen!” unhon nay mulk men allaah kee har ibaadatgaah nazar-ay-aatish kar dee hai.
9ab ham par koee ilaahee nishaan zaahir naheen hota. na koee nabee hamaaray paas rah gaya, na koee aur maujood hai jo jaanta ho ki aisay haalaat kab tak rahengay.
10ai allaah, hareef kab tak laan-taan karega, dushman kab tak teray naam kee takfeer karega?
11too apna haath kyoon hataata, apna dahena haath door kyoon rakhta hai? usay apnee chaadar say nikaal kar unhen tabaah kar day!
12allaah qadeem zamaanay say mera baadshaah hai, vahee duniya men najaatabakhsh kaam anjaam deta hai.
13too hee nay apnee qudrat say samundar ko cheer kar paanee men ajhdahaaon kay saron ko tod daala.
14too hee nay liviyaataan kay saron ko choor choor karkay usay janglee jaanvaron ko khila diya.
15ek jagah too nay chashmay aur nadiyaan phootnay deen, doosree jagah kabhee na sookhnay vaalay darya sookhnay diay.
16din bhee tera hai, raat bhee teree hee hai. chaand aur sooraj teray hee haath say qaaim huay.
17too hee nay zameen kee hudood muqarrar keen, too hee nay garmiyon aur sardiyon kay mausam banaaay.
18ai rabb, dushman kee laan-taan yaad kar. khayaal kar ki ahemaq qaum teray naam par kufr baktee hai.
19apnay kabootar kee jaan ko vaheshee jaanvaron kay havaalay na kar, hamesha tak apnay museebatazadon kee zindagee ko na bhool.
20apnay ahd ka lihaaz kar, kyoonki mulk kay taareek konay zulm kay maidaanon say bhar gaay hain.
21honay na day ki mazloomon ko sharminda ho kar peechhay hatna paday balki bakhsh day ki museebatzada aur ghareeb teray naam par fakhar kar saken.
22ai allaah, uth kar adaalat men apnay muaamalay ka difa kar. yaad rahay ki ahemaq din bhar tujhay laan-taan karta hai.
23apnay dushmanon kay naaray na bhool balki apnay mukhaalifon ka musalsal badhta hua shor-sharaaba yaad kar.