Zaboor 75
allaah maghrooron kee adaalat karta hai
1aasaf ka zaboor. mooseeqee kay raahanuma kay liyay. tarz : tabaah na kar.
ai allaah, tera shukr ho, tera shukr! tera naam un kay qareeb hai jo teray mojizay bayaan kartay hain.
2allaah farmaata hai, “jab mera vaqt aaega to main insaaf say adaalat karoonga.
3go zameen apnay baashindon samet dagmagaanay lagay, lekin main hee nay us kay satoonon ko mazboot kar diya hai. (silaah)
4shekheebaazon say main nay kaha, ‘deengen mat maaro,’ aur bedeenon say, ‘apnay aap par fakhar mat karo [a] lafzee tarjuma : seeng mat uthaao. .
5na apnee taaqat par shekhee maaro [b] lafzee matlab : na apna seeng uthaao. , na akad kar kufr bako’.”
6kyoonki sarfaraazee na mashriq say, na maghrib say aur na biyaabaan say aatee hai
7balki allaah say jo munsif hai. vahee ek ko past kar deta hai aur doosray ko sarfaraaz.
8kyoonki rabb kay haath men jhaagdaar aur masaaledaar mai ka piyaala hai jisay vah logon ko pila deta hai. yaqeenan duniya kay tamaam bedeenon ko isay aakhiree qatray tak peena hai.
9lekin main hamesha allaah kay azeem kaam sunaaoonga, hamesha yaaqoob kay khuda kee madahsaraaee karoonga.
10allaah farmaata hai, “main tamaam bedeenon kee kamar tod doonga jabki raastbaaz sarfaraaz hogaa [c] lafzee tarjuma : bedeenon kay tamaam seengon ko kaat daaloonga jabki raastbaazon ka seeng sarfaraaz ho jaaega. .”