Zaboor 77
allaah kay azeem kaamon say tasallee miltee hai
1aasaf ka zaboor. mooseeqee kay raahanuma kay liyay. yadootoon kay liyay.
main allaah say faryaad karkay madad kay liyay chillaata hoon, main allaah ko pukaarta hoon ki mujh par dhyaan day.
2apnee museebat men main nay rabb ko talaash kiya. raat kay vaqt meray haath bilaanaagha us kee taraf uthay rahay. meree jaan nay tasallee paanay say inkaar kiya.
3main allaah ko yaad karta hoon to aahen bharnay lagta hoon, main soch-bichaar men pad jaata hoon to rooh nidhaal ho jaatee hai. (silaah)
4too meree aankhon ko band honay naheen deta. main itna bechain hoon ki bol bhee naheen sakta.
5main qadeem zamaanay par ghaur karta hoon, un saalon par jo badee der huay guzar gaay hain.
6raat ko main apna geet yaad karta hoon. mera dil mahev-ay-khayaal raheta aur meree rooh tafteesh kartee rahetee hai.
7“kya rabb hamesha kay liyay radd karega, kya aainda hamen kabhee pasand naheen karega?
8kya us kee shafqat hamesha kay liyay jaatee rahee hai? kya us kay vaaday ab say javaab day gaay hain?
9kya allaah meharbaanee karna bhool gaya hai? kya us nay ghussay men apna rahem baaz rakha hai?” (silaah)
10main bola, “is say mujhay dukh hai ki allaah t’aala ka dahena haath badal gaya hai.”
11main rabb kay kaam yaad karoonga, haan qadeem zamaanay kay teray mojizay yaad karoonga.
12jo kuchh too nay kiya us kay har paheloo par ghaur-o-khauz karoonga, teray azeem kaamon men mahev-ay-khayaal rahoonga.
13ai allaah, teree raah quddoos hai. kaun sa maabood hamaaray khuda jaisa azeem hai?
14too hee mojizay karnay vaala khuda hai. aqvaam kay darmiyaan too nay apnee qudrat ka izhaar kiya hai.
15badee quvvat say too nay ivzaana day kar apnee qaum, yaaqoob aur yoosuf kee aulaad ko riha kar diya hai. (silaah)
16ai allaah, paanee nay tujhay dekha, paanee nay tujhay dekha to tadapnay laga, gaheraaiyon tak laraznay laga.
17mooslaadhaar baarish barsee, baadal garaj uthay aur teray teer idhar udhar chalnay lagay.
18aandhee men teree aavaaz kadaktee rahee, duniya bijliyon say raushan huee, zameen kaamptee kaamptee uchhal padee.
19teree raah samundar men say, tera raasta gaheray paanee men say guzra, to bhee teray naqsh-ay-qadam kisee ko nazar na aaay.
20moosa aur haaroon kay haath say too nay revad kee tarah apnee qaum kee raahanumaaee kee.