Zaboor 78
israaeel kee taareekh men ilaahee saza aur rahem
1aasaf ka zaboor. hikmat ka geet.
ai meree qaum, meree hidaayat par dhyaan day, meray munh kee baaton par kaan laga.
2main tamseelon men baat karoonga, qadeem zamaanay kay muammay bayaan karoonga.
3jo kuchh ham nay sun liya aur hamen maaloom hua hai, jo kuchh hamaaray baapdaada nay hamen sunaaya hai
4usay ham un kee aulaad say naheen chhupaaengay. ham aanay vaalee pusht ko rabb kay qaabil-ay-taareef kaam bataaengay, us kee qudrat aur mojizaat bayaan karengay.
5kyoonki us nay yaaqoob kee aulaad ko shareeat dee, israaeel men ahkaam qaaim kiay. us nay farmaaya ki hamaaray baapdaada yah ahkaam apnee aulaad ko sikhaaen
6taaki aanay vaalee pusht bhee unhen apnaaay, vah bachchay jo abhee paida naheen huay thay. phir unhen bhee apnay bachchon ko sunaana tha.
7kyoonki allaah kee marzee hai ki is tarah har pusht allaah par etimaad rakh kar us kay azeem kaam na bhoolay balki us kay ahkaam par amal karay.
8vah naheen chaahata ki vah apnay baapdaada kee maanind hon jo ziddee aur sarkash nasal thay, aisee nasal jis ka dil saabitqadam naheen tha aur jis kee rooh vafaadaaree say allaah say liptee na rahee.
9chunaanchay ifraaeem kay mard go kamaanon say les thay jang kay vaqt faraar huay.
10vah allaah kay ahd say vafaadaar na rahay, us kee shareeat par amal karnay kay liyay tayyaar naheen thay.
11jo kuchh us nay kiya tha, jo mojizay us nay unhen dikhaaay thay, ifraaeemee vah sab kuchh bhool gaay.
12mulk-ay-misr kay ilaaqay zuan men us nay un kay baapdaada kay dekhtay dekhtay mojizay kiay thay.
13samundar ko cheer kar us nay unhen us men say guzarnay diya, aur donon taraf paanee mazboot deevaar kee tarah khada raha.
14din ko us nay baadal kay zareeay aur raat bhar chamakdaar aag say un kee qiyaadat kee.
15registaan men us nay pattharon ko chaak karkay unhen samundar kee see kasrat ka paanee pilaaya.
16us nay honay diya ki chataan say nadiyaan phoot niklen aur paanee daryaaon kee tarah bahenay lagay.
17lekin vah us ka gunaah karnay say baaz na aaay balki registaan men allaah t’aala say sarkash rahay.
18jaan-boojh kar unhon nay allaah ko aazma kar vah khuraak maangee jis ka laalach kartay thay.
19allaah kay khilaaf kufr bak kar vah bolay, “kya allaah registaan men hamaaray liyay mez bichha sakta hai?
20beshak jab us nay chataan ko maara to paanee phoot nikla aur nadiyaan bahenay lageen. lekin kya vah rotee bhee day sakta hai, apnee qaum ko gosht bhee muhayya kar sakta hai? yah to naamumkin hai.”
21yah sun kar rabb taish men a gaya. yaaqoob kay khilaaf aag bhadak uthee, aur us ka ghazab israaeel par naazil hua.
22kyoon? is liyay ki unhen allaah par yaqeen naheen tha, vah us kee najaat par bharosa naheen rakhtay thay.
23is kay baavujood allaah nay un kay oopar baadlon ko hukm day kar aasmaan kay darvaazay khol diay.
24us nay khaanay kay liyay un par mann barsaaya, unhen aasmaan say rotee khilaaee.
25har ek nay farishton kee yah rotee khaaee balki allaah nay itna khaana bheja ki un kay pet bhar gaay.
26phir us nay aasmaan par mashriqee hava chalaaee aur apnee qudrat say junoobee hava pahunchaaee.
27us nay gard kee tarah un par gosht barsaaya, samundar kee ret jaisay beshumaar parinday un par girnay diay.
28khaimaagaah kay beech men hee vah gir paday, un kay gharon kay ird-gird hee zameen par a giray.
29tab vah kha kha kar khoob ser ho gaay, kyoonki jis ka laalach vah kartay thay vah allaah nay unhen muhayya kiya tha.
30lekin un ka laalach abhee poora naheen hua tha aur gosht abhee un kay munh men thaa
31ki allaah ka ghazab un par naazil hua. qaum kay khaatay-peetay log halaak huay, israaeel kay javaan khaak men mil gaay.
32in tamaam baaton kay baavujood vah apnay gunaahon men izaafa kartay gaay aur us kay mojizaat par eemaan na laaay.
33is liyay us nay un kay din naakaamee men guzarnay diay, aur un kay saal dahshat kee haalat men ikhtitaampazeer huay.
34jab kabhee allaah nay un men qatl-o-ghaarat honay dee to vah usay dhoondnay lagay, vah mud kar allaah ko talaash karnay lagay.
35tab unhen yaad aaya ki allaah hamaaree chataan, allaah t’aala hamaara chhudaanay vaala hai.
36lekin vah munh say usay dhoka detay, zabaan say usay jhoot pesh kartay thay.
37na un kay dil saabitqadmee say us kay saath liptay rahay, na vah us kay ahd say vafaadaar rahay.
38to bhee allaah rahemdil raha. us nay unhen tabaah na kiya balki un ka qusoor muaaf karta raha. baar baar vah apnay ghazab say baaz aaya, baar baar apna poora qaher un par utaarnay say gurez kiya.
39kyoonki usay yaad raha ki vah faanee insaan hain, hava ka ek jhonka jo guzar kar kabhee vaapas naheen aata.
40registaan men vah kitnee dafa us say sarkash huay, kitnee martaba usay dukh pahunchaaya.
41baar baar unhon nay allaah ko aazmaaya, baar baar israaeel kay quddoos ko ranjeeda kiya.
42unhen us kee qudrat yaad na rahee, vah din jab us nay fidya day kar unhen dushman say chhudaaya,
43vah din jab us nay misr men apnay ilaahee nishaan dikhaaay, zuan kay ilaaqay men apnay mojizay kiay.
44us nay un kee naheron ka paanee khoon men badal diya, aur vah apnee nadiyon ka paanee pee na sakay.
45us nay un kay darmiyaan jooon kay ghol bhejay jo unhen kha gaeen, mendhak jo un par tabaahee laaay.
46un kee paidaavaar us nay javaan tiddiyon kay havaalay kee, un kee mehanat ka phal baaligh tiddiyon kay sapurd kiya.
47un kee angoor kee belen us nay olon say, un kay anjeer-toot kay darakht sailaab say tabaah kar diay.
48un kay maveshee us nay olon kay havaalay kiay, un kay revad bijlee kay sapurd kiay.
49us nay un par apna sholaazan ghazab naazil kiya. qaher, khafgee aur museebat yaanee tabaahee laanay vaalay farishton ka poora dasta un par hamlaaaavar hua.
50us nay apnay ghazab kay liyay raasta tayyaar karkay unhen maut say na bachaaya balki muhalak vaba kee zad men aanay diya.
51misr men us nay tamaam pahelauthon ko maar daala aur haam kay khaimon men mardaangee ka pahela phal tamaam kar diya.
52phir vah apnee qaum ko bhed-bakriyon kee tarah misr say baahar la kar registaan men revad kee tarah liyay phira.
53vah hifaazat say un kee qiyaadat karta raha. unhen koee dar naheen tha jabki un kay dushman samundar men doob gaay.
54yoon allaah nay unhen muqaddas mulk tak pahunchaaya, us pahaad tak jisay us kay dahenay haath nay haasil kiya tha.
55un kay aagay aagay vah deegar qaumen nikaalta gaya. un kee zameen us nay taqseem karkay israaeeliyon ko meeraas men dee, aur un kay khaimon men us nay israaeelee qabeelay basaaay.
56is kay baavujood vah allaah t’aala ko aazmaanay say baaz na aaay balki us say sarkash huay aur us kay ahkaam kay tahet na rahay.
57apnay baapdaada kee tarah vah ghaddaar ban kar bevafa huay. vah dheelee kamaan kee tarah naakaam ho gaay.
58unhon nay oonchee jagahon kee ghalat qurbaanagaahon say allaah ko ghussa dilaaya aur apnay buton say usay ranjeeda kiya.
59jab allaah ko khabar milee to vah ghazabnaak hua aur israaeel ko mukammal taur par mustarad kar diya.
60us nay saila men apnee sukoonatgaah chhod dee, vah khaima jis men vah insaan kay darmiyaan sukoonat karta tha.
61ahd ka sandooq us kee qudrat aur jalaal ka nishaan tha, lekin us nay usay dushman kay havaalay karkay jilaavatanee men jaanay diya.
62apnee qaum ko us nay talvaar kee zad men aanay diya, kyoonki vah apnee mauroosee milkiyat say nihaayat naaraaz tha.
63qaum kay javaan nazar-ay-aatish huay, aur us kee kunvaariyon kay liyay shaadee kay geet gaaay na gaay.
64us kay imaam talvaar say qatl huay, aur us kee bevaaon nay maatam na kiya.
65tab rabb jaag utha, us aadmee kee tarah jis kee neend uchaat ho gaee ho, us soormay kee maanind jis say nashay ka asar utar gaya ho.
66us nay apnay dushmanon ko maar maar kar bhaga diya aur unhen hamesha kay liyay sharminda kar diya.
67us vaqt us nay yoosuf ka khaima radd kiya aur ifraaeem kay qabeelay ko na chunaa
68balki yahoodaah kay qabeelay aur koh-ay-siyyoon ko chun liya jo usay piyaara tha.
69us nay apna maqdis bulandiyon kee maanind banaaya, zameen kee maanind jisay us nay hamesha kay liyay qaaim kiya hai.
70us nay apnay khaadim daaood ko chun kar bhed-bakriyon kay baadon say bulaaya.
71haan, us nay usay bhedon [a] ibraanee matan say muraad vah bhed hai jo abhee apnay bachchon ko doodh pilaatee hai. kee dekh-bhaal say bulaaya taaki vah us kee qaum yaaqoob, us kee meeraas israaeel kee gallaabaanee karay.
72daaood nay khuloosdilee say un kee gallaabaanee kee, badee mahaarat say us nay un kee raahanumaaee kee.