Zaboor 79

jang kee museebat men qaum kee duaa

¹aasaf ka zaboor.

ai allaah, ajnabee qaumen teree mauroosee zameen men ghus aaee hain. unhon nay teree muqaddas sukoonatgaah kee behuramtee karkay yarooshalam ko malbay ka dher bana diya hai.

²unhon nay teray khaadimon kee laashen parindon ko aur teray eemaandaaron ka gosht janglee jaanvaron ko khila diya hai.

³yarooshalam kay chaaron taraf unhon nay khoon kee nadiyaan bahaaeen, aur koee baaqee na raha jo murdon ko dafnaata.

⁴hamaaray padosiyon nay hamen mazaaq ka nishaana bana liya hai, ird-gird kee qaumen hamaaree hansee udaatee aur laan-taan kartee hain.

⁵ai rabb, kab tak? kya too hamesha tak ghussay hoga? teree ghairat kab tak aag kee tarah bhadaktee rahegee?

⁶apna ghazab un aqvaam par naazil kar jo tujhay tasleem naheen karteen, un saltanaton par jo teray naam ko naheen pukaarateen.

⁷kyoonki unhon nay yaaqoob ko hadap karkay us kee rihaaishgaah tabaah kar dee hai.

⁸hamen un gunaahon kay qusoorvaar na thahera jo hamaaray baapdaada say sarzad huay. ham par rahem karnay men jaldee kar, kyoonki ham bahut pastahaal ho gaay hain.

⁹ai hamaaree najaat kay khuda, hamaaree madad kar taaki teray naam ko jalaal milay. hamen bacha, apnay naam kee khaatir hamaaray gunaahon ko muaaf kar.

¹⁰deegar aqvaam kyoon kahen, “un ka khuda kahaan hai?” hamaaray dekhtay dekhtay unhen dikha ki too apnay khaadimon kay khoon ka badla leta hai.

¹¹qaidiyon kee aahen tujh tak pahuncheen, jo marnay ko hain unhen apnee azeem qudrat say mahfooz rakh.

¹²ai rabb, jo laan-taan hamaaray padosiyon nay tujh par barsaaee hai usay saat guna un kay saron par vaapas la.

¹³tab ham jo teree qaum aur teree charaagaah kee bheden hain abad tak teree sitaaish karengay, pusht-dar-pusht teree hamd-o-sana karengay.