Zaboor 80
angoor kee bel kee bahaalee kay liyay duaa
1aasaf ka zaboor. mooseeqee kay raahanuma kay liyay. tarz : ahd kay sosan.
ai israaeel kay gallaabaan, ham par dhyaan day! too jo yoosuf kee revad kee tarah raahanumaaee karta hai, ham par tavajjuh kar! too jo karoobee farishton kay darmiyaan takhtnasheen hai, apna noor chamka!
2ifraaeem, binyameen aur manassee kay saamnay apnee qudrat ko harkat men la. hamen bachaanay a!
3ai allaah, hamen bahaal kar. apnay chiharay ka noor chamka to ham najaat paaengay.
4ai rabb, lashkaron kay khuda, tera ghazab kab tak bhadakta rahega, haalaanki teree qaum tujh say iltija kar rahee hai?
5too nay unhen aansooon kee rotee khilaaee aur aansooon ka piyaala khoob pilaaya.
6too nay hamen padosiyon kay jhagdon ka nishaana banaaya. hamaaray dushman hamaara mazaaq udaatay hain.
7ai lashkaron kay khuda, hamen bahaal kar. apnay chiharay ka noor chamka to ham najaat paaengay.
8angoor kee jo bel misr men ug rahee thee usay too ukhaad kar mulk-ay-kan’aan laaya. too nay vahaan kee aqvaam ko bhaga kar yah bel un kee jagah lagaaee.
9too nay us kay liyay zameen tayyaar kee to vah jad pakad kar pooray mulk men phail gaee.
10us ka saaya pahaadon par chha gaya, aur us kee shaakhon nay deodaar kay azeem darakhton ko dhaank liya.
11us kee taheniyaan maghrib men samundar tak phail gaeen, us kee daaliyaan mashriq men darya-ay-furaat tak pahunch gaeen.
12too nay us kee chaardeevaaree kyoon gira dee? ab har guzarnay vaala us kay angoor tod leta hai.
13jangal kay sooar usay kha kha kar tabaah kartay, khulay maidaan kay jaanvar vahaan chartay hain.
14ai lashkaron kay khuda, hamaaree taraf dubaara rujoo farma! aasmaan say nazar daal kar haalaat par dhyaan day. is bel kee dekh-bhaal kar.
15usay mahfooz rakh jisay teray dahenay haath nay zameen men lagaaya, us betay ko jisay too nay apnay liyay paala hai.
16is vaqt vah kat kar nazar-ay-aatish hua hai. teray chiharay kee daant-dapat say log halaak ho jaatay hain.
17tera haath apnay dahenay haath kay banday ko panaah day, us aadamzaad ko jisay too nay apnay liyay paala tha.
18tab ham tujh say door naheen ho jaaengay. bakhsh day ki hamaaree jaan men jaan aaay to ham tera naam pukaarengay.
19ai rabb, lashkaron kay khuda, hamen bahaal kar. apnay chiharay ka noor chamka to ham najaat paaengay.