Zaboor 83
qaum kay dushmanon kay khilaaf duaa
1geet. aasaf ka zaboor.
ai allaah, khaamosh na rah! ai allaah, chup na rah!
2dekh, teray dushman shor macha rahay hain, tujh say nafrat karnay vaalay apna sar teray khilaaf utha rahay hain.
3teree qaum kay khilaaf vah chaalaak mansoobay baandh rahay hain, jo teree aad men chhup gaay hain un kay khilaaf saazishen kar rahay hain.
4vah kahetay hain, “aao, ham unhen mita den taaki qaum nest ho jaaay aur israaeel ka naam-o-nishaan baaqee na rahay.”
5kyoonki vah aapas men salaah-mashvra karnay kay baad dilee taur par muttahid ho gaay hain, unhon nay teray hee khilaaf ahd baandha hai.
6un men adom kay khaimay, ismaaeelee, moaab, haajiree,
7jabaal, ammon, amaaleeq, philistiya aur soor kay baashinday shaamil ho gaay hain.
8asoor bhee un men shareek ho kar loot kee aulaad ko sahaara day raha hai. (silaah)
9un kay saath vahee sulook kar jo too nay midiyaaniyon say yaanee qaison nadee par seesra aur yaabeen say kiya.
10kyoonki vah ain-dor kay paas halaak ho kar khet men gobar ban gaay.
11un kay shurfa kay saath vahee bartaao kar jo too nay oreb aur zaeb say kiya. un kay tamaam sardaar zibah aur zalmunna kee maanind ban jaaen,
12jinhon nay kaha, “aao, ham allaah kee charaagaahon par qabza karen.”
13ai meray khuda, unhen ludhakbootee aur hava men udtay huay bhoosay kee maanind bana day.
14jis tarah aag pooray jangal men phail jaatee aur ek hee shola pahaadon ko jhulsa deta hai,
15usee tarah apnee aandhee say un ka taaqqub kar, apnay toofaan say un ko dahshatzada kar day.
16ai rabb, un ka munh kaala kar taaki vah tera naam talaash karen.
17vah hamesha tak sharminda aur havaasabaakhta rahen, vah sharmasaar ho kar halaak ho jaaen.
18tab hee vah jaan lengay ki too hee jis ka naam rabb hai allaah t’aala yaanee pooree duniya ka maalik hai.