Zaboor 84
rabb kay ghar par khushee
1qorah khaandaan ka zaboor. mooseeqee kay raahanuma kay liyay. tarz : gitteet.
ai rabb-ul-afwaaj, teree sukoonatgaah kitnee piyaaree hai!
2meree jaan rabb kee baargaahon kay liyay tadaptee huee nidhaal hai. mera dil balki poora jism zinda khuda ko zor say pukaar raha hai.
3ai rabb-ul-afwaaj, ai meray baadshaah aur khuda, teree qurbaanagaahon kay paas parinday ko bhee ghar mil gaya, abaabeel ko bhee apnay bachchon ko paalnay ka ghonsla mil gaya hai.
4mubaarak hain vah jo teray ghar men bastay hain, vah hamesha hee teree sitaaish karengay. (silaah)
5mubaarak hain vah jo tujh men apnee taaqat paatay, jo dil say teree raahon men chaltay hain.
6vah buka kee khushk vaadee [a] ya ronay vaalee yaanee aansooon kee vaadee. men say guzartay huay usay shaadaab jagah bana letay hain, aur baarishen usay barkaton say dhaamp detee hain.
7vah qadam-ba-qadam taqviyat paatay huay aagay badhtay, sab koh-ay-siyyoon par allaah kay saamnay haazir ho jaatay hain.
8ai rabb, ai lashkaron kay khuda, meree dua sun! ai yaaqoob kay khuda, dhyaan day! (silaah)
9ai allaah, hamaaree dhaal par karam kee nigaah daal. apnay masah kiay huay khaadim kay chiharay par nazar kar.
10teree baargaahon men ek din kisee aur jagah par hazaar dinon say behatar hai. mujhay apnay khuda kay ghar kay darvaazay par haazir rahena bedeenon kay gharon men basnay say kaheen ziyaada pasand hai.
11kyoonki rabb khuda aaftaab aur dhaal hai, vahee hamen fazl aur izzat say navaazta hai. jo diyaanatdaaree say chalen unhen vah kisee bhee achchhee cheez say maheroom naheen rakhta.
12ai rabb-ul-afwaaj, mubaarak hai vah jo tujh par bharosa rakhta hai