Zaboor 85
naay siray say barkat paanay kay liyay duaa
1qorah kee aulaad ka zaboor. mooseeqee kay raahanuma kay liyay. ai rabb, pahelay too nay apnay mulk ko pasand kiya, pahelay yaaqoob ko bahaal kiya.
2pahelay too nay apnee qaum ka qusoor muaaf kiya, us ka tamaam gunaah dhaamp diya. (silaah)
3jo ghazab ham par naazil ho raha tha us ka silsila too nay rok diya, jo qaher hamaaray khilaaf bhadak raha tha usay chhod diya.
4ai hamaaree najaat kay khuda, hamen dubaara bahaal kar. ham say naaraaz honay say baaz a.
5kya too hamesha tak ham say ghussay rahega? kya too apna qaher pusht-dar-pusht qaaim rakhega?
6kya too dubaara hamaaree jaan ko taazaadam naheen karega taaki teree qaum tujh say khush ho jaaay?
7ai rabb, apnee shafqat ham par zaahir kar, apnee najaat hamen ata farma.
8main vah kuchh sunoonga jo khuda rabb faramaaega. kyoonki vah apnee qaum aur apnay eemaandaaron say salaamatee ka vaada karega, alabatta laazim hai ki vah dubaara hamaaqat men ulajh na jaaen.
9yaqeenan us kee najaat un kay qareeb hai jo us ka khauf maantay hain taaki jalaal hamaaray mulk men sukoonat karay.
10shafqat aur vafaadaaree ek doosray kay galay lag gaay hain, raastee aur salaamatee nay ek doosray ko bosa diya hai.
11sachchaaee zameen say phoot niklegee aur raastee aasmaan say zameen par nazar daalegee.
12allaah zaroor vah kuchh dega jo achchha hai, hamaaree zameen zaroor apnee faslen paida karegee.
13raastee us kay aagay aagay chal kar us kay qadmon kay liyay raasta tayyaar karegee.