Zaboor 86
museebat men duaa
1daaood kee dua.
ai rabb, apna kaan jhuka kar meree sun, kyoonki main museebatzada aur muhtaaj hoon.
2meree jaan ko mahfooz rakh, kyoonki main eemaandaar hoon. apnay khaadim ko bacha jo tujh par bharosa rakhta hai. too hee mera khuda hai!
3ai rabb, mujh par meharbaanee kar, kyoonki din bhar main tujhay pukaarta hoon.
4apnay khaadim kee jaan ko khush kar, kyoonki main tera aarzoomand hoon.
5kyoonki too ai rabb bhala hai, too muaaf karnay kay liyay tayyaar hai. jo bhee tujhay pukaartay hain un par too badee shafqat karta hai.
6ai rabb, meree dua sun, meree iltijaaon par tavajjuh kar.
7museebat kay din main tujhay pukaarta hoon, kyoonki too meree sunta hai.
8ai rabb, maaboodon men say koee teree maanind naheen hai. jo kuchh too karta hai koee aur naheen kar sakta.
9ai rabb, jitnee bhee qaumen too nay banaaeen vah a kar teray huzoor sijda karengee aur teray naam ko jalaal dengee.
10kyoonki too hee azeem hai aur mojizay karta hai. too hee khuda hai.
11ai rabb, mujhay apnee raah sikha taaki teree vafaadaaree men chaloon. bakhsh day ki main pooray dil say tera khauf maanoon.
12ai rabb meray khuda, main pooray dil say tera shukr karoonga, hamesha tak teray naam kee taazeem karoonga.
13kyoonki teree mujh par shafqat azeem hai, too nay meree jaan ko paataal kee gaheraaiyon say chhudaaya hai.
14ai allaah, maghroor meray khilaaf uth khaday huay hain, zaalimon ka jatha meree jaan lenay kay darpai hai. yah log tera lihaaz naheen kartay.
15lekin too, ai rabb, raheem aur meharbaan khuda hai. too tahemmul, shafqat aur vafa say bharpoor hai.
16meree taraf rujoo farma, mujh par meharbaanee kar! apnay khaadim ko apnee quvvat ata kar, apnee khaadima kay betay ko bacha.
17mujhay apnee meharbaanee ka koee nishaan dikha. mujh say nafrat karnay vaalay yah dekh kar sharminda ho jaaen ki too rabb nay meree madad karkay mujhay tasallee dee hai.