Zaboor 88

tark kiay gaay shakhs kay liyay duaa

¹qorah kee aulaad ka zaboor. mooseeqee kay raahanuma kay liyay. tarz : mahelat l’annot. haimaan izraahee ka hikmat ka geet.

ai rabb, ai meree najaat kay khuda, din raat main teray huzoor cheekhta chillaata hoon.

²meree dua teray huzoor pahunchay, apna kaan meree cheekhon kee taraf jhuka.

³kyoonki meree jaan dukh say bharee hai, aur meree taangen qabr men latkee huee hain.

⁴mujhay un men shumaar kiya jaata hai jo paataal men utar rahay hain. main us mard kee maanind hoon jis kee tamaam taaqat jaatee rahee hai.

⁵mujhay murdon men tanha chhoda gaya hai, qabr men un maqtoolon kee tarah jin ka too ab khayaal naheen rakhta aur jo teray haath kay sahaaray say munqatay ho gaay hain.

⁶too nay mujhay sab say gaheray gadhay men, taareektareen gaheraaiyon men daal diya hai.

⁷teray ghazab ka poora bojh mujh par a pada hai, too nay mujhay apnee tamaam maujon kay neechay daba diya hai. (silaah)

⁸too nay meray qareebee doston ko mujh say door kar diya hai, aur ab vah mujh say ghin khaatay hain. main phansa hua hoon aur nikal naheen sakta.

⁹meree aankhen gham kay maaray pajhmurda ho gaee hain. ai rabb, din bhar main tujhay pukaarta, apnay haath teree taraf uthaaay rakhta hoon.

¹⁰kya too murdon kay liyay mojizay karega? kya paataal kay baashinday uth kar teree tamjeed karengay? (silaah)

¹¹kya log qabr men teree shafqat ya paataal men teree vafa bayaan karengay?

¹²kya taareekee men teray mojizay ya mulk-ay-faraamosh men teree raastee maaloom ho jaaegee?

¹³lekin ai rabb, main madad kay liyay tujhay pukaarta hoon, meree dua subah-saveray teray saamnay a jaatee hai.

¹⁴ai rabb, too meree jaan ko kyoon radd karta, apnay chiharay ko mujh say posheeda kyoon rakhta hai?

¹⁵main museebatzada aur javaanee say maut kay qareeb raha hoon. teray dahshatanaak hamlay bardaasht kartay kartay main jaan say haath dho baitha hoon.

¹⁶tera bhadakta qaher mujh par say guzar gaya, teray haulnaak kaamon nay mujhay naabood kar diya hai.

¹⁷din bhar vah mujhay sailaab kee tarah gheray rakhtay hain, har taraf say mujh par hamlaaaavar hotay hain.

¹⁸too nay meray doston aur padosiyon ko mujh say door kar rakha hai. taareekee hee meree qareebee dost ban gaee hai.