Zaboor 9
allaah kee qudrat aur insaaf
1daaood ka zaboor. mooseeqee kay raahanuma kay liyay. tarz : alaamoot-labbeen.
ai rabb, main pooray dil say teree sitaaish karoonga, teray tamaam mojizaat ka bayaan karoonga.
2main shaadmaan ho kar teree khushee manaaoonga. ai allaah t’aala, main teray naam kee tamjeed men geet gaaoonga.
3jab meray dushman peechhay hat jaaengay to vah thokar kha kar teray huzoor tabaah ho jaaengay.
4kyoonki too nay mera insaaf kiya hai, too takht par baith kar raast munsif saabit hua hai.
5too nay aqvaam ko malaamat karkay bedeenon ko halaak kar diya, un ka naam-o-nishaan hamesha kay liyay mita diya hai.
6dushman tabaah ho gaya, abad tak malbay ka dher ban gaya hai. too nay shaheron ko jad say ukhaad diya hai, aur un kee yaad tak baaqee naheen rahegee.
7lekin rabb hamesha tak takhtnasheen rahega, aur us nay apnay takht ko adaalat karnay kay liyay khada kiya hai.
8vah raastee say duniya kee adaalat karega, insaaf say ummaton ka faisla karega.
9rabb mazloomon kee panaahgaah hai, ek qil’a jis men vah museebat kay vaqt mahfooz rahetay hain.
10ai rabb, jo tera naam jaantay vah tujh par bharosa rakhtay hain. kyoonki jo teray taalib hain unhen too nay kabhee tark naheen kiya.
11rabb kee tamjeed men geet gaao jo siyyoon pahaad par takhtnasheen hai, ummaton men vah kuchh sunaao jo us nay kiya hai.
12kyoonki jo maqtoolon ka intiqaam leta hai vah museebatazadon kee cheekhen nazar’andaaz naheen karta.
13ai rabb, mujh par rahem kar! meree us takleef par ghaur kar jo nafrat karnay vaalay mujhay pahuncha rahay hain. mujhay maut kay darvaazon men say nikaal kar utha le
14taaki main siyyoon betee kay darvaazon men teree sitaaish karkay vah kuchh sunaaoon jo too nay meray liyay kiya hai, taaki main teree najaat kee khushee manaaoon.
15aqvaam us gadhay men khud gir gaee hain jo unhon nay doosron ko pakadnay kay liyay khoda tha. un kay apnay paaon us jaal men phans gaay hain jo unhon nay doosron ko phansaanay kay liyay bichha diya tha.
16rabb nay insaaf karkay apna izhaar kiya to bedeen apnay haath kay phanday men ulajh gaya. (higgaayoon ka tarz. silaah)
17bedeen paataal men utarengay, jo ummaten allaah ko bhool gaee hain vah sab vahaan jaaengee.
18kyoonki vah zarooratmandon ko hamesha tak naheen bhoolega, museebatazadon kee ummeed abad tak jaatee naheen rahegee.
19ai rabb, uth khada ho taaki insaan ghaalib na aaay. bakhsh day ki teray huzoor aqvaam kee adaalat kee jaaay.
20ai rabb, unhen dahshatzada kar taaki aqvaam jaan len ki insaan hee hain. (silaah