chauthee kitaab 90-106

faanee insaan allaah men panaah le

¹mard-ay-khuda moosa kee dua.

ai rabb, pusht-dar-pusht too hamaaree panaahgaah raha hai.

²is say pahelay ki pahaad paida huay aur too zameen aur duniya ko vujood men laaya too hee tha. ai allaah, too azal say abad tak hai.

³too insaan ko dubaara khaak honay deta hai. too farmaata hai, ‘ai aadamazaado, dubaara khaak men mil jaao!’

⁴kyoonki teree nazar men hazaar saal kal kay guzray huay din kay baraabar ya raat kay ek paher kee maanind hain.

⁵too logon ko sailaab kee tarah baha lay jaata hai, vah neend aur us ghaas kee maanind hain jo subah ko phoot nikaltee hai.

⁶vah subah ko phoot nikaltee aur ugtee hai, lekin shaam ko murjha kar sookh jaatee hai.

⁷kyoonki ham teray ghazab say fana ho jaatay aur teray qaher say havaasabaakhta ho jaatay hain.

⁸too nay hamaaree khataaon ko apnay saamnay rakha, hamaaray posheeda gunaahon ko apnay chiharay kay noor men laaya hai.

⁹chunaanchay hamaaray tamaam din teray qaher kay tahet ghattay ghattay khatm ho jaatay hain. jab ham apnay saalon kay ikhtitaam par pahunchtay hain to zindagee sard aah kay baraabar hee hotee hai.

¹⁰hamaaree umr 70 saal ya agar ziyaada taaqat ho to 80 saal tak pahunchtee hai, aur jo din fakhar ka baais thay vah bhee takleefdih aur bekaar hain. jald hee vah guzar jaatay hain, aur ham parindon kee tarah ud kar chalay jaatay hain.

¹¹kaun teray ghazab kee pooree shiddat jaanta hai? kaun samajhta hai ki tera qaher hamaaree khudaatarasee kee kamee kay mutaabiq hee hai?

¹²chunaanchay hamen hamaaray dinon ka saheeh hisaab karna sikha taaki hamaaray dil daanishmand ho jaaen.

¹³ai rabb, dubaara hamaaree taraf rujoo farma! too kab tak door rahega? apnay khaadimon par taras kha!

¹⁴subah ko hamen apnee shafqat say ser kar! tab ham zindagee bhar baagh baagh hongay aur khushee manaaengay.

¹⁵hamen utnay hee din khushee dila jitnay too nay hamen past kiya hai, utnay hee saal jitnay hamen dukh sahena pada hai.

¹⁶apnay khaadimon par apnay kaam aur un kee aulaad par apnee azmat zaahir kar.

¹⁷rabb hamaara khuda hamen apnee meharbaanee dikhaaay. hamaaray haathon ka kaam mazboot kar, haan hamaaray haathon ka kaam mazboot kar