Zaboor 91

allaah kee panaah men

¹jo allaah t’aala kee panaah men rahay vah qaadir-ay-mutlaq kay saay men sukoonat karega.

²main kahoonga, “ai rabb, too meree panaah aur mera qil’a hai, mera khuda jis par main bharosa rakhta hoon.”

³kyoonki vah tujhay chideemaar kay phanday aur muhalak marz say chhudaaega.

⁴vah tujhay apnay shaahaparon kay neechay dhaamp lega, aur too us kay paron talay panaah lay sakega. us kee vafaadaaree teree dhaal aur pushta rahegee.

⁵raat kee dahshaton say khauf mat kha, na us teer say jo din kay vaqt chalay.

⁶us muhalak marz say dahshat mat kha jo taareekee men ghoomay phiray, na us vabaaee beemaaree say jo dopaher kay vaqt tabaahee phailaaay.

⁷go teray saath khaday hazaar afraad halaak ho jaaen aur teray dahenay haath das hazaar mar jaaen, lekin too us kee zad men naheen aaega.

⁸too apnee aankhon say is ka mulaahaza karega, too khud bedeenon kee saza dekhega.

⁹kyoonki too nay kaha hai, “rabb meree panaahgaah hai,” too allaah t’aala kay saay men chhup gaya hai.

¹⁰is liyay tera kisee bala say vaasta naheen padega, koee aafat bhee teray khaimay kay qareeb phataknay naheen paaegee.

¹¹kyoonki vah apnay farishton ko har raah par teree hifaazat karnay ka hukm dega,

¹²aur vah tujhay apnay haathon par utha lengay taaki teray paaon ko patthar say thes na lagay.

¹³too sherbabron aur zahereelay saampon par qadam rakhega, too javaan sheron aur ajhdahaaon ko kuchal dega.

¹⁴rabb farmaata hai, “choonki vah mujh say lipta raheta hai is liyay main usay bachaaoonga. choonki vah mera naam jaanta hai is liyay main usay mahfooz rakhoonga.

¹⁵vah mujhay pukaarega to main us kee sunoonga. museebat men main us kay saath hoonga. main usay chhuda kar us kee izzat karoonga.

¹⁶main usay umr kee daraazee bakhshoonga aur us par apnee najaat zaahir karoonga.”