Zaboor 94
qaum par zulm karnay vaalon say rihaaee kay liyay duaa
1ai rabb, ai intiqaam lenay vaalay khuda! ai intiqaam lenay vaalay khuda, apna noor chamka.
2ai duniya kay munsif, uth kar maghrooron ko un kay aamaal kee munaasib saza day.
3ai rabb, bedeen kab tak, haan kab tak fatah kay naaray lagaaengay?
4vah kufr kee baaten ugaltay rahetay, tamaam badkaar shekhee maartay rahetay hain.
5ai rabb, vah teree qaum ko kuchal rahay, teree mauroosee milkiyat par zulm kar rahay hain.
6bevaaon aur ajnabiyon ko vah maut kay ghaat utaar rahay, yateemon ko qatl kar rahay hain.
7vah kahetay hain, “yah rabb ko nazar naheen aata, yaaqoob ka khuda dhyaan hee naheen deta.”
8ai qaum kay naadaano, dhyaan do! ai ahemqo, tumhen kab samajh aaegee?
9jis nay kaan banaaya, kya vah naheen sunta? jis nay aankh ko tashkeel diya kya vah naheen dekhta?
10jo aqvaam ko tambeeh karta aur insaan ko taaleem deta hai kya vah saza naheen deta?
11rabb insaan kay khayaalaat jaanta hai, vah jaanta hai ki vah dam bhar kay hee hain.
12ai rabb, mubaarak hai vah jisay too tarbiyat deta hai, jisay too apnee shareeat kee taaleem deta hai
13taaki vah museebat kay dinon say aaraam paaay aur us vaqt tak sukoon say zindagee guzaaray jab tak bedeenon kay liyay gadha tayyaar na ho.
14kyoonki rabb apnee qaum ko radd naheen karega, vah apnee mauroosee milkiyat ko tark naheen karega.
15faislay dubaara insaaf par mabnee hongay, aur tamaam diyaanatdaar dil us kee pairvee karengay.
16kaun shareeron kay saamnay mera difa karega? kaun meray liyay badkaaron ka saamna karega?
17agar rabb mera sahaara na hota to meree jaan jald hee khaamoshee kay mulk men ja bastee.
18ai rabb, jab main bola, “mera paaon dagmagaanay laga hai” to teree shafqat nay mujhay sambhaala.
19jab tashveeshanaak khayaalaat mujhay bechain karnay lagay to teree tasalliyon nay meree jaan ko taazaadam kiya.
20ai allaah, kya tabaahee kee hukoomat teray saath muttahid ho saktee hai, aisee hukoomat jo apnay farmaanon say zulm kartee hai? hargiz naheen!
21vah raastbaaz kee jaan lenay kay liyay aapas men mil jaatay aur bequsooron ko qaatil thaheraatay hain.
22lekin rabb mera qil’a ban gaya hai, aur mera khuda meree panaah kee chataan saabit hua hai.
23vah un kee naainsaafee un par vaapas aanay dega aur un kee shareer harkaton kay javaab men unhen tabaah karega. rabb hamaara khuda unhen nest karega.