Zaboor 96
duniya ka khaaliq aur munsif
1rabb kee tamjeed men naya geet gaao, ai pooree duniya, rabb kee madahsaraaee karo.
2rabb kee tamjeed men geet gaao, us kay naam kee sitaaish karo, roz-ba-roz us kee najaat kee khushkhabaree sunaao.
3qaumon men us ka jalaal aur tamaam ummaton men us kay ajaaib bayaan karo.
4kyoonki rabb azeem aur sitaaish kay bahut laaiq hai. vah tamaam maaboodon say maheeb hai.
5kyoonki deegar qaumon kay tamaam maabood but hee hain jabki rabb nay aasmaan ko banaaya.
6us kay huzoor shaan-o-shaukat, us kay maqdis men qudrat aur jalaal hai.
7ai qaumon kay qabeelo, rabb kee tamjeed karo, rabb kay jalaal aur qudrat kee sitaaish karo.
8rabb kay naam ko jalaal do. qurbaanee lay kar us kee baargaahon men daakhil ho jaao.
9muqaddas libaas say aaraasta ho kar rabb ko sijda karo. pooree duniya us kay saamnay laraz uthay.
10qaumon men elaan karo, “rabb hee baadshaah hai! yaqeenan duniya mazbootee say qaaim hai aur naheen dagmagaaegee. vah insaaf say qaumon kee adaalat karega.”
11aasmaan khush ho, zameen jashn manaaay! samundar aur jo kuchh us men hai khushee say garaj uthay.
12maidaan aur jo kuchh us men hai baagh baagh ho. phir jangal kay darakht shaadiyaana bajaaengay.
13vah rabb kay saamnay shaadiyaana bajaaengay, kyoonki vah a raha hai, vah duniya kee adaalat karnay a raha hai. vah insaaf say duniya kee adaalat karega aur apnee sadaaqat say aqvaam ka faisla karega.