Zaboor 99
quddoos khudaa
1rabb baadshaah hai, aqvaam laraz uthen! vah karoobee farishton kay darmiyaan takhtnasheen hai, duniya dagamagaaay!
2koh-ay-siyyoon par rabb azeem hai, tamaam aqvaam par sarbuland hai.
3vah teray azeem aur purjalaal naam kee sitaaish karen, kyoonki vah quddoos hai.
4vah baadshaah kee qudrat kee tamjeed karen jo insaaf say piyaar karta hai. ai allaah, too hee nay adal qaaim kiya, too hee nay yaaqoob men insaaf aur raastee paida kee hai.
5rabb hamaaray khuda kee taazeem karo, us kay paaon kee chaukee kay saamnay sijda karo, kyoonki vah quddoos hai.
6moosa aur haaroon us kay imaamon men say thay. samooel bhee un men say tha jo us ka naam pukaartay thay. unhon nay rabb ko pukaara, aur us nay un kee sunee.
7vah baadal kay satoon men say un say hamkalaam hua, aur vah un ahkaam aur farmaanon kay taabay rahay jo us nay unhen diay thay.
8ai rabb hamaaray khuda, too nay un kee sunee. too jo allaah hai unhen muaaf karta raha, alabatta unhen un kee buree harkaton kee saza bhee deta raha.
9rabb hamaaray khuda kee taazeem karo aur us kay muqaddas pahaad par sijda karo, kyoonki rabb hamaara khuda quddoos hai.