Paidāish 1

duniyā kī taḵẖlīq kā pahalā din : raushnī

¹ibtidā meṅ allāh ne āsmān aur zamīn ko banāyā. ²abhī tak zamīn vīrān aur ḵẖālī thī. vah gahare pānī se ḍhakī huī thī jis ke ūpar aṅdherā hī aṅdherā thā. allāh kā rūh pānī ke ūpar maṅḍlā rahā thā.

³phir allāh ne kahā, “raushnī ho jāe” to raushnī paidā ho gaī. ⁴allāh ne dekhā ki raushnī acchhī hai, aur us ne raushnī ko tārīkī se alag kar diyā. ⁵allāh ne raushnī ko din kā nām diyā aur tārīkī ko rāt kā. shām huī, phir subah. yūṅ pahalā din guzar gayā.

dūsrā din : āsmān

⁶allāh ne kahā, “pānī ke darmiyān ek aisā gumbad paidā ho jāe jis se nichlā pānī ūpar ke pānī se alag ho jāe.” ⁷aisā hī huā. allāh ne ek aisā gumbad banāyā jis se nichlā pānī ūpar ke pānī se alag ho gayā. ⁸allāh ne gumbad ko āsmān kā nām diyā. shām huī, phir subah. yūṅ dūsrā din guzar gayā.

tīsrā din : ḵẖushk zamīn aur paude

⁹allāh ne kahā, “jo pānī āsmān ke nīche hai vah ek jagah jamā ho jāe tāki dūsrī taraf ḵẖushk jagah nazar āe.” aisā hī huā. ¹⁰allāh ne ḵẖushk jagah ko zamīn kā nām diyā aur jamāshudā pānī ko samundar kā. aur allāh ne dekhā ki yah acchhā hai. ¹¹phir us ne kahā, “zamīn hariyāval paidā kare, aise paude jo bīj rakhte hoṅ aur aise daraḵẖt jin ke phal apnī apnī qism ke bīj rakhte hoṅ.” aisā hī huā. ¹²zamīn ne hariyāval paidā kī, aise paude jo apnī apnī qism ke bīj rakhte aur aise daraḵẖt jin ke phal apnī apnī qism ke bīj rakhte the. allāh ne dekhā ki yah acchhā hai. ¹³shām huī, phir subah. yūṅ tīsrā din guzar gayā.

chauthā din : sūraj, chāṅd aur sitāre

¹⁴allāh ne kahā, “āsmān par raushniyāṅ paidā ho jāeṅ tāki din aur rāt meṅ imtiyāz ho aur isī tarah muḵẖtalif mausmoṅ, dinoṅ aur sāloṅ meṅ bhī. ¹⁵āsmān kī yah raushniyāṅ duniyā ko raushan kareṅ.” aisā hī huā. ¹⁶allāh ne do baṛī raushniyāṅ banāīṅ, sūraj jo baṛā thā din par hukūmat karne ko aur chāṅd jo chhoṭā thā rāt par. in ke ilāvā us ne sitāroṅ ko bhī banāyā. ¹⁷us ne unheṅ āsmān par rakhā tāki vah duniyā ko raushan kareṅ, ¹⁸din aur rāt par hukūmat kareṅ aur raushnī aur tārīkī meṅ imtiyāz paidā kareṅ. allāh ne dekhā ki yah acchhā hai. ¹⁹shām huī, phir subah. yūṅ chauthā din guzar gayā.

pāṅchvāṅ din : pānī aur havā ke jāndār

²⁰allāh ne kahā, “pānī ābī jāndāroṅ se bhar jāe aur fizā meṅ parinde uṛte phireṅ.” ²¹allāh ne baṛe baṛe samundarī jānvar banāe, pānī kī tamām dīgar maḵẖlūqāt aur har qism ke par rakhne vāle jāndār bhī banāe. allāh ne dekhā ki yah acchhā hai. ²²us ne unheṅ barkat dī aur kahā, “phalo phūlo aur tādād meṅ baṛhte jāo. samundar tum se bhar jāe. isī tarah parinde zamīn par tādād meṅ baṛh jāeṅ.” ²³shām huī, phir subah. yūṅ pāṅchvāṅ din guzar gayā.

chhaṭā din : zamīn par chalne vāle jānvar aur insān

²⁴allāh ne kahā, “zamīn har qism ke jāndār paidā kare : maveshī, reṅgne vāle aur jaṅglī jānvar.” aisā hī huā. ²⁵allāh ne har qism ke maveshī, reṅgne vāle aur jaṅglī jānvar banāe. us ne dekhā ki yah acchhā hai.