Paidāish 6

5rabb ne dekhā ki insān nihāyat bigaṛ gayā hai, ki us ke tamām ḵẖayālāt lagātār burāī kī taraf māil rahate haiṅ. 6vah pachhtāyā ki maiṅ ne insān ko banā kar duniyā meṅ rakh diyā hai, aur use saḵẖt dukh huā. 7us ne kahā, “go maiṅ hī ne insān ko ḵẖalaq kiyā maiṅ use rū-e-zamīn par se miṭā ḍālūṅgā. maiṅ na sirf logoṅ ko balki zamīn par chalne phirne aur reṅgne vāle jānvaroṅ aur havā ke parindoṅ ko bhī halāk kar dūṅgā, kyūṅki maiṅ pachhtātā hūṅ ki maiṅ ne un ko banāyā.”

baṛe sailāb ke liye nūh kī tayyāriyāṅ

8sirf nūh par rabb kī nazar-e-karam thī. 9yah us kī zindagī kā bayān hai.

nūh rāstbāz thā. us zamāne ke logoṅ meṅ sirf vahī bequsūr thā. vah allāh ke sāth sāth chaltā thā.10nūh ke tīn beṭe the, sim, hām aur yāfat. 11lekin duniyā allāh kī nazar meṅ bigṛī huī aur zulm-o-tashaddud se bharī huī thī. 12jahāṅ bhī allāh dekhtā duniyā ḵẖarāb thī, kyūṅki tamām jāndāroṅ ne zamīn par apnī ravish ko bigāṛ diyā thā.

13tab allāh ne nūh se kahā, “maiṅ ne tamām jāndāroṅ ko ḵẖatm karne kā faislā kiyā hai, kyūṅki un ke sabab se pūrī duniyā zulm-o-tashaddud se bhar gaī hai. chunāṅche maiṅ un ko zamīn samet tabāh kar dūṅgā. 14ab apne liye sarv[a] ibrānī lafz matrūk hai. shāyad is kā matlab sarv yā deodār kī lakṛī ho.kī lakṛī kī kashtī banā le. us meṅ kamre hoṅ aur use andar aur bāhar tārkol lagā.15us kī lambāī 450 fuṭ, chauṛāī 75 fuṭ aur ūṅchāī 45 fuṭ ho. 16kashtī kī chhat ko yūṅ banānā ki us ke nīche 18 iṅch khulā rahe. ek taraf darvāzā ho, aur us kī tīn manzileṅ hoṅ. 17maiṅ pānī kā itnā baṛā sailāb lāūṅgā ki vah zamīn ke tamām jāndāroṅ ko halāk kar ḍālegā. zamīn par sab kuchh fanā ho jāegā. 18lekin tere sāth maiṅ ahd bāṅdhūṅgā jis ke tahat tū apne beṭoṅ, apnī bīvī aur bahūoṅ ke sāth kashtī meṅ jāegā. 19har qism ke jānvar kā ek nar aur ek mādā bhī apne sāth kashtī meṅ le jānā tāki vah tere sāth jīte bacheṅ. 20har qism ke par rakhne vāle jānvar aur har qism ke zamīn par phirne yā reṅgne vāle jānvar do do ho kar tere pās āeṅge tāki jīte bach jāeṅ. 21jo bhī ḵẖurāk darkār hai use apne aur un ke liye jamā karke kashtī meṅ mahfūz kar lenā.”

22nūh ne sab kuchh vaisā hī kiyā jaisā allāh ne use batāyā.

[a] ibrānī lafz matrūk hai. shāyad is kā matlab sarv yā deodār kī lakṛī ho.

Paidāish 7

sailāb kā aġāz

1phir rabb ne nūh se kahā, “apne gharāne samet kashtī meṅ dāḵẖil ho jā, kyūṅki is daur ke logoṅ meṅ se maiṅ ne sirf tujhe rāstbāz pāyā hai. 2har qism ke pāk jānvaroṅ meṅ se sāt sāt nar-o-mādā ke joṛe jabki nāpāk jānvaroṅ meṅ se nar-o-mādā kā sirf ek ek joṛā sāth le jānā. 3isī tarah har qism ke par rakhne vāloṅ meṅ se sāt sāt nar-o-mādā ke joṛe bhī sāth le jānā tāki un kī nasleṅ bachī raheṅ. 4ek hafte ke bād maiṅ chālīs din aur chālīs rāt mutvātir bārish barasāūṅgā. is se maiṅ tamām jāndāroṅ ko rū-e-zamīn par se miṭā ḍālūṅgā, agarchi maiṅ hī ne unheṅ banāyā hai.”

5nūh ne vaisā hī kiyā jaisā rabb ne hukm diyā thā. 6vah 600 sāl kā thā jab yah tūfānī sailāb zamīn par āyā.

7tūfānī sailāb se bachne ke liye nūh apne beṭoṅ, apnī bīvī aur bahūoṅ ke sāth kashtī meṅ savār huā. 8zamīn par phirne vāle pāk aur nāpāk jānvar, par rakhne vāle aur tamām reṅgne vāle jānvar bhī āe. 9nar-o-mādā kī sūrat meṅ do do ho kar vah nūh ke pās ā kar kashtī meṅ savār hue. sab kuchh vaisā hī huā jaisā allāh ne nūh ko hukm diyā thā. 10ek hafte ke bād tūfānī sailāb zamīn par ā gayā.

11yah sab kuchh us vaqt huā jab nūh 600 sāl kā thā. dūsre mahīne ke 17veṅ din zamīn kī gaharāiyoṅ meṅ se tamām chashme phūṭ nikle aur āsmān par pānī ke darīche khul gae. 12chālīs din aur chālīs rāt tak mūslādhār bārish hotī rahī. 13jab bārish shurū huī to nūh, us ke beṭe sim, hām aur yāfat, us kī bīvī aur bahūeṅ kashtī meṅ savār ho chuke the. 14un ke sāth har qism ke jaṅglī jānvar, maveshī, reṅgne aur par rakhne vāle jānvar the. 15har qism ke jāndār do do ho kar nūh ke pās ā kar kashtī meṅ savār ho chuke the. 16nar-o-mādā āe the. sab kuchh vaisā hī huā thā jaisā allāh ne nūh ko hukm diyā thā. phir rabb ne darvāze ko band kar diyā.

17chālīs din tak tūfānī sailāb jārī rahā. pānī chaṛhā to us ne kashtī ko zamīn par se uṭhā liyā. 18pānī zor pakaṛ kar bahut baṛh gayā, aur kashtī us par tairne lagī. 19āḵẖirkār pānī itnā ziyādā ho gayā ki tamām ūṅche pahāṛ bhī us meṅ chhup gae, 20balki sab se ūṅchī choṭī par pānī kī gaharāī 20 fuṭ thī. 21zamīn par rahane vālī har maḵẖlūq halāk huī. parinde, maveshī, jaṅglī jānvar, tamām jāndār jin se zamīn bharī huī thī aur insān, sab kuchh mar gayā. 22zamīn par har jāndār maḵẖlūq halāk huī. 23yūṅ har maḵẖlūq ko rū-e-zamīn par se miṭā diyā gayā. insān, zamīn par phirne aur reṅgne vāle jānvar aur parinde, sab kuchh ḵẖatm kar diyā gayā. sirf nūh aur kashtī meṅ savār us ke sāthī bach gae.

24sailāb ḍeṛh sau din tak zamīn par ġālib rahā.

Paidāish 8

sailāb kā iḵẖtitām

1lekin allāh ko nūh aur tamām jānvar yād rahe jo kashtī meṅ the. us ne havā chalā dī jis se pānī kam hone lagā. 2zamīn ke chashme aur āsmān par ke pānī ke darīche band ho gae, aur bārish ruk gaī. 3pānī ghaṭtā gayā. 150 din ke bād vah kāfī kam ho gayā thā. 4sātveṅ mahīne ke 17veṅ din kashtī arārāt ke ek pahāṛ par ṭik gaī. 5dasveṅ mahīne ke pahale din pānī itnā kam ho gayā thā ki pahāṛoṅ kī choṭiyāṅ nazar āne lagī thīṅ.

6-7 chālīs din ke bād nūh ne kashtī kī khiṛkī khol kar ek kavvā chhoṛ diyā, aur vah uṛ kar chalā gayā. lekin jab tak zamīn par pānī thā vah ātā jātā rahā. 8phir nūh ne ek kabūtar chhoṛ diyā tāki patā chale ki zamīn pānī se nikal āī hai yā nahīṅ. 9lekin kabūtar ko kahīṅ bhī baiṭhne kī jagah na milī, kyūṅki ab tak pūrī zamīn par pānī hī pānī thā. vah kashtī aur nūh ke pās vāpas ā gayā, aur nūh ne apnā hāth baṛhāyā aur kabūtar ko pakaṛ kar apne pās kashtī meṅ rakh liyā.

10us ne ek haftā aur intizār karke kabūtar ko dubārā chhoṛ diyā. 11shām ke vaqt vah lauṭ āyā. is dafā us kī choṅch meṅ zaitūn kā tāzā pattā thā. tab nūh ko mālūm huā ki zamīn pānī se nikal āī hai.

12us ne mazīd ek hafte ke bād kabūtar ko chhoṛ diyā. is dafā vah vāpas na āyā.

13jab nūh 601 sāl kā thā to pahale mahīne ke pahale din zamīn kī satah par pānī ḵẖatm ho gayā. tab nūh ne kashtī kī chhat khol dī aur dekhā ki zamīn kī satah par pānī nahīṅ hai. 14dūsre mahīne ke 27veṅ din zamīn bilkul ḵẖushk ho gaī.

15phir allāh ne nūh se kahā, 16“apnī bīvī, beṭoṅ aur bahūoṅ ke sāth kashtī se nikal ā. 17jitne bhī jānvar sāth haiṅ unheṅ nikāl de, ḵẖwāh parinde hoṅ, ḵẖwāh zamīn par phirne yā reṅgne vāle jānvar. vah duniyā meṅ phail jāeṅ, nasal baṛhāeṅ aur tādād meṅ baṛhte jāeṅ.” 18chunāṅche nūh apne beṭoṅ, apnī bīvī aur bahūoṅ samet nikal āyā. 19tamām jānvar aur parinde bhī apnī apnī qism ke gurohoṅ meṅ kashtī se nikle.

20us vaqt nūh ne rabb ke liye qurbāngāh banāī. us ne tamām phirne aur uṛne vāle pāk jānvaroṅ meṅ se kuchh chun kar unheṅ zabah kiyā aur qurbāngāh par pūrī tarah jalā diyā. 21yah qurbāniyāṅ dekh kar rabb ḵẖush huā aur apne dil meṅ kahā, “ab se maiṅ kabhī zamīn par insān kī vajah se lānat nahīṅ bhejūṅgā, kyūṅki us kā dil bachpan hī se burāī kī taraf māil hai. ab se maiṅ kabhī is tarah tamām jān rakhne vālī maḵẖlūqāt ko rū-e-zamīn par se nahīṅ miṭāūṅgā. 22duniyā ke muqarrarā auqāt jārī raheṅge. bīj bone aur fasal kāṭne kā vaqt, ṭhaṅḍ aur tapish, garmiyoṅ aur sardiyoṅ kā mausam, din aur rāt, yah sab kuchh duniyā ke aḵẖīr tak qāim rahegā.”

Paidāish 9

allāh kā nūh ke sāth ahd

1phir allāh ne nūh aur us ke beṭoṅ ko barkat de kar kahā, “phalo phūlo aur tādād meṅ baṛhte jāo. duniyā tum se bhar jāe 2zamīn par phirne aur reṅgne vāle jānvar, parinde aur machhliyāṅ sab tum se ḍareṅge. unheṅ tumhāre iḵẖtiyār meṅ kar diyā gayā hai. 3jis tarah maiṅ ne tumhāre khāne ke liye paudoṅ kī paidāvār muqarrar kī hai isī tarah ab se tumheṅ har qism ke jānvar khāne kī ijāzat bhī hai. 4lekin ḵẖabardār! aisā gosht na khānā jis meṅ ḵẖūn hai, kyūṅki ḵẖūn meṅ us kī jān hai.

5kisī kī jān lenā manā hai. jo aisā karegā use apnī jān denī paṛegī, ḵẖwāh vah insān ho yā haivān. maiṅ ḵẖud is kā mutālbā karūṅgā. 6jo bhī kisī kā ḵẖūn bahāe us kā ḵẖūn bhī bahāyā jāegā. kyūṅki allāh ne insān ko apnī sūrat par banāyā hai.

7ab phalo phūlo aur tādād meṅ baṛhte jāo. duniyā meṅ phail jāo.”

8tab allāh ne nūh aur us ke beṭoṅ se kahā, 9“ab maiṅ tumhāre aur tumhārī aulād ke sāth ahd qāim kartā hūṅ. 10yah ahd un tamām jānvaroṅ ke sāth bhī hogā jo kashtī meṅ se nikle haiṅ yānī parindoṅ, maveshiyoṅ aur zamīn par ke tamām jānvaroṅ ke sāth. 11maiṅ tumhāre sāth ahd bāṅdh kar vādā kartā hūṅ ki ab se aisā kabhī nahīṅ hogā ki zamīn kī tamām zindagī sailāb se ḵẖatm kar dī jāegī. ab se aisā sailāb kabhī nahīṅ āegā jo pūrī zamīn ko tabāh kar de. 12is abdī ahd kā nishān jo maiṅ tumhāre aur tamām jāndāroṅ ke sāth qāim kar rahā hūṅ yah hai ki 13maiṅ apnī kamān bādloṅ meṅ rakhtā hūṅ. vah mere duniyā ke sāth ahd kā nishān hogā. 14jab kabhī mere kahane par āsmān par bādal chhā jāeṅge aur qaus-e-quzah un meṅ se nazar āegī 15to maiṅ yah ahd yād karūṅgā jo tumhāre aur tamām jāndāroṅ ke sāth kiyā gayā hai. ab kabhī bhī aisā sailāb nahīṅ āegā jo tamām zindagī ko halāk kar de. 16qaus-e-quzah nazar āegī to maiṅ use dekh kar us dāimī ahd ko yād karūṅgā jo mere aur duniyā kī tamām jāndār maḵẖlūqāt ke darmiyān hai. 17yah us ahd kā nishān hai jo maiṅ ne duniyā ke tamām jāndāroṅ ke sāth kiyā hai.”