Paidāish 12

abrām kī bulāhaṭ

1rabb ne abrām se kahā, “apne vatan, apne rishtedāroṅ aur apne bāp ke ghar ko chhoṛkar us mulk meṅ chalā jā jo maiṅ tujhe dikhāūṅgā. 2maiṅ tujh se ek baṛī qaum banāūṅgā, tujhe barkat dūṅgā aur tere nām ko bahut baṛhāūṅgā. tū dūsroṅ ke liye barkat kā bāis hogā. 3jo tujhe barkat deṅge unheṅ maiṅ bhī barkat dūṅgā. jo tujh par lānat karegā us par maiṅ bhī lānat karūṅgā. duniyā kī tamām qaumeṅ tujh se barkat pāeṅgī.”

4abrām ne rabb kī sunī aur hārān se ravānā huā. lūt us ke sāth thā. us vaqt abrām 75 sāl kā thā. 5us ke sāth us kī bīvī sāray aur us kā bhatījā lūt the. vah apne naukar-chākroṅ samet apnī pūrī milkiyat bhī sāth le gayā jo us ne hārān meṅ hāsil kī thī. chalte chalte vah kan’ān pahuṅche. 6abrām us mulk meṅ se guzar kar sikam ke maqām par ṭhahar gayā jahāṅ morih ke balūt kā daraḵẖt thā. us zamāne meṅ mulk meṅ kan’ānī qaumeṅ ābād thīṅ.

7vahāṅ rabb abrām par zāhir huā aur us se kahā, “maiṅ terī aulād ko yah mulk dūṅgā.” is liye us ne vahāṅ rabb kī tāzīm meṅ qurbāngāh banāī jahāṅ vah us par zāhir huā thā. 8vahāṅ se vah us pahāṛī ilāqe kī taraf gayā jo bait-el ke mashriq meṅ hai. vahāṅ us ne apnā ḵẖaimā lagāyā. maġrib meṅ bait-el thā aur mashriq meṅ aī. is jagah par bhī us ne rabb kī tāzīm meṅ qurbāngāh banāī aur rabb kā nām le kar ibādat kī.

Paidāish 15

abrām ke sāth rabb kā ahd

1is ke bād rabb royā meṅ abrām se hamkalām huā, “abrām, mat ḍar. maiṅ hī terī sipar hūṅ, maiṅ hī terā bahut baṛā ajr hūṅ.”

2lekin abrām ne etirāz kiyā, “ai rabb qādir-e-mutlaq, tū mujhe kyā degā jabki abhī tak mere hāṅ koī bacchā nahīṅ hai aur ilīazar damishqī merī mīrās pāegā. 3tū ne mujhe aulād nahīṅ baḵẖshī, is liye mere gharāne kā naukar merā vāris hogā.” 4tab abrām ko allāh se ek aur kalām milā. “yah ādmī ilīazar terā vāris nahīṅ hogā balki terā apnā hī beṭā terā vāris hogā.” 5rabb ne use bāhar le jā kar kahā, “āsmān kī taraf dekh aur sitāroṅ ko ginne kī koshish kar. terī aulād itnī hī beshumār hogī.”

6abrām ne rabb par bharosā rakhā. is binā par allāh ne use rāstbāz qarār diyā.

Paidāish 17

ahd kā nishān : ḵẖatnā

1jab abrām 99 sāl kā thā to rabb us par zāhir huā. us ne kahā, “maiṅ allāh qādir-e-mutlaq hūṅ. mere huzūr chaltā rah aur beilzām ho. 2maiṅ tere sāth apnā ahd bāṅdhūṅgā aur terī aulād bahut hī ziyādā baṛhā dūṅgā.”

3abrām muṅh ke bal gir gayā, aur allāh ne us se kahā, 4“merā tere sāth ahd hai ki tū bahut qaumoṅ kā bāp hogā. 5ab se tū abrām yānī ‘azīm bāp’ nahīṅ kahalāegā balki terā nām ibrāhīm yānī ‘bahut qaumoṅ kā bāp’ hogā. kyūṅki maiṅ ne tujhe bahut qaumoṅ kā bāp banā diyā hai. 6maiṅ tujhe bahut hī ziyādā aulād baḵẖsh dūṅgā, itnī ki qaumeṅ baneṅgī. tujh se bādshāh bhī nikaleṅge. 7maiṅ apnā ahd tere aur terī aulād ke sāth nasal-dar-nasal qāim karūṅgā, ek abdī ahd jis ke mutābiq maiṅ terā aur terī aulād kā ḵẖudā hūṅgā.